قمر الحمل في خريطة الميلاد.

 

. قمر الحمل ناري بيحكمه المريخ  فبعيداً عن وضع خريطتك، كواكبك او هيمنتك مكان زي ده لوحده هيلعب دور كبير لأن حتي اهدأ الاشخاص اللي عندهم قمر مماثل بيكون ليهم نوبات غضب بين حين وآخر. قمر الحمل بيخلق نمط حياة سريع للشخص وده اللي بيخليه اغلب الوقت مستعجل وعايز كل حاجة تحصل دلوقتي.

. بشكل عام القمر مش بيرتاح في برج الحمل لأن سيطرة المريخ عليه بتقلق راحته وتعكر صفو حياته كأن في شخص طول الوقت فوق دماغه ومش سايبه في حاله فسهل تلاقي الشخص دايماً عايز يعمل حاجة، يتخذ موقف او يعبر عن طاقته بأي شكل وعشان كده الاشخاص دي "بتبدع" بمعني الكلمة في المجالات التنافسية؛ السريعة؛ اللي فيها نسبة مجازفة وخطورة. 

. وعلي فكرة احياناً اشخاص قمر الحمل بتواجه تحكم، سيطرة او اشراف اعلي من شخص علي تصرفاتهم وحياتهم وفي الاغلب بيكون فرد من اسرته واحياناً شريك. في افضل الاحتمالات قد يكون في مشجع في حياته بيدفعه للانجاز وفي اسوأ الاحتمالات ممكن تلاقي ان الاشخاص اللي في محيطه بتتحداه طول الوقت وبتدفعه للجنون أو بتثير غضبه بسهولة. 

. لو هنتكلم بشوية منطقية قمر الحمل بيدعم الشخص جداً مهنياً نظراً لقوة شغفه وحبه لنفسه ورغبته المستمرة للنجاح ومش اي نجاح هدفهم "القمة" فالمريخ هنا بيساعده وبيمنحه الشجاعة الكافية لمواجهة التحديات وكمان للمنافسة. وهتلاقي ان اغلب الاشخاص دي بتحطم الارقام القياسية وبتنجح بقوة.

. جانب العلاقات لقمر الحمل مثير للاهتمام شوية لأن غريزة الشخص هنا بتقوده بشكل كبير فصعب يفكر في عقبات او نتائج اختياراته لأن كل تركيزه علي رغبته ومشاعره اللحظية ولذلك بيكثر عليهم الاشاعات والكلام وسهل تلاقي جزء منهم واقع او طرف في علاقة ثلاثية واكبر مثال انجلينا صاحبة قمر الحمل مع براد بيت وقصتها مع جنيفر انيستون مثلاً. 

. قمر الحمل بيتفق مع زهرة الحمل في انجذابهم للعلاقات اللي بتشكل تحدي ومصدر للشك والاشاعات وفي اسوأ الظروف ممكن يدخلوا علاقات فيها تعنيف وغيرة وغير صحية بالمرة واشهر مثال هي Rihanna صاحبة قمر الحمل وقضيتها مع chris brown وده بيرجع لتسرع الاشخاص دي وتقديرهم الخطأ لبعض الأمور.

. من وجهة نظري قمر الحمل عنده امكانية يكون في انجح العلاقات لو بس قلل من تسرعه وبدأ يفكر في نتيجة اختياراته بشكل منطقي وعادةً برج وبيت واتصالات المريخ هتقولك القمر ده هيتصرف ازاي في الخريطة بجانب ذلك قمر الحمل دمهم خفيف، عندهم شعبية وجداً أشخاص مثيرة وجذابة سواء ذكور أو أناث.

. الحمل بيحب يكون في المقدمة خاصًة  قمر الحمل دايمًا هيحقق سبق في حياته أو هيعمل إنجاز محدش حققه في محيطه قبله؛ ولذلك قمر الحمل قائد و رائد بالفطرة ممكن يكون أول واحد في محيط أسرته يتزوج أو أول شخص يحقق ثراء أو ينجح في مجال مختلف وجديد وممكن يكون أول حفيد في أسرته أو البنت الوحيدة وسط أخوات ذكور أو الرجل الوحيد وسط أخوات إناث دايمًا هيتميز بطريقًة ما وهيكون في المقدمة. 

← في النهاية خريطتك ليها الكلمة الأخيرة لأنك مش بس قمر حمل. وافتكر دايماً ان مفيش بطل لحكايتك غيرك وان دايماً عندك فرصة ووقت. وكالعادة اتمني للجميع يوم مشرق، مبهج وجميل :) 




افتكر دايماً ان ليك كامل الحق تقول رأيك وتقول لأ وكمان تنهي اي وضع مش ملائم ليك. انت مش مجبر علي الاستمرار في شئ بيأذيك نفسياً او جسدياً. ولما تحس انك محتاج اجازة خدها واعرف قد ايه انت قوي و انك الشخص الوحيد المسؤول عن حياتك وإنك دايمًا تقدر.. 



ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

قمر الثور في خريطة الميلاد.

 

. قمر الثور قمر ترابي بتحكمه الزهرة و يا الله علي لطافة الأشخاص دي، لا توصف! مهما كان الشخص عصبي او مندفع وجود قمره في برج زي الثور هيساعده يتحكم جداً في اعصابه او علي الاقل هيعرف يقدر نفسه ف مش هتلاقي انه مستعد يدخل معارك وحروب زي قمر الحمل مثلاً المحكوم بالمريخ.

. تأثير الزهرة علي قمر الثور بتخلق عنده رغبة شديدة في الاستمتاع، الشخص هنا عايز يستمتع بيومه، بروتينه، عايز يكون في محيط جميل ومتناغم ولذلك حب الاشخاص دي للجمال والفن والالوان والمزيكا جداً عالي وحتي لو الشخص مش موهوب فنياً هتلاقي انه متذوق رائع وعنده حاسة مميزة.

. القمر بيحب يكون في برج الثور لأن قدرة الشخص هنا علي ايجاد متعة في ابسط الامور جداً قوية فممكن تلاقيه في قمة سعادته وهو بيشرب قهوته او هو بيلعب مع قطته او هو بيقرأ كتابه المفضل وابسط الاشياء فيها تسعده طالما ليها قيمة عنده، زي وردة، رسالة صغيرة، فيلم جميل وهكذا.

. ومن وجهة نظري قمر الثور ميزته وعيبه نفس الشئ "الاسترخاء" المبالغ فيه لأن الشخص عادةً بيحط نفسه في محيط وبيخلق لنفسه حياة فيها نسبة رخاء عالية وبعيدة عن وجع الدماغ وده سر الروقان بتاعهم بس في نفس الوقت نمط مماثل سهل يخلي الشخص احياناً مش عارف ياخد موقف ومش عارف يواجه مشاكله.

. ارتباط  قمر الثور بالعالم المادي مرتبط بأحتياجه المستمر "لاثباتات مادية" هو مش بس هدفه فلوس، ممتلكات او غيره لأ هو عايز يتأكد من استمرار و وجود كل مصدر وشخص في حياته ولذلك هتلاقي البعض منهم متملك والبعض الاخر بيخاف من التغيير حتي لو في مصلحته لأنه عارف انه ده هيشقلب حياته.

. ولذلك ملوك ال "comfort zone" هما اصحاب قمر الثور وده بيرجع لثقة كبيرة في النفس وشعور عميق بالامتنان، فالشخص مش عايز يعرض عضلاته ولا مهتم يجذب الاهتمام وعشان كده الاشخاص دي تمتلك تواضع وغموض كبير ومهما حسيت انه يبدو عادي او واضح تأكد انه يمتلك جانب اعمق بكتير بس مخبيه كويس.

. لو هنتكلم عن طبيعة علاقات قمر الثور هتلاقي انه جانب مثير لأن الشخص هنا عنده استقرار ووفرة جذابين جداً للاخرين لأن في شئ في وجودهم بيحسسك بالامان او بيفكرك بذكريات ممتعة وبسيطة في حياتك فسهل تلاقي ان الناس حابة وجودهم وصداقاتهم حتي لو من بعيد لبعيد او في اطار تقليدي.

. في نفس الوقت قمر الثور سهل يدخل علاقات استغلالية زي انه يتم استغلاله مادياً او يتحول للشخص اللي كله بيفتكره وقت الجد والمصائب وعشان كده سهل تلاقي جزء منهم عالق في علاقات وصداقات غير صحية لفترة واحياناً برضه زي زهرة الثور خوفهم من التغيير هو اللي بيجبرهم علي الاستمرار.

. قمر الثور يمتلك براءة كبيرة ومهما الشخص كبر بيفضل يحب نفس الحاجات بنفس الشغف كأنه اول مرة يشوفها فسهل تحس انهم اطفال كبار. وتغيب عنهم مهما تغيب في كل مرة هترجعلهم هتلاقي عندهم دفا وحب وتقبل مش موجودين في الدنيا بجانب حلاوتهم الجبارة. وقاعدة ثابتة: مفيش قمر ثور وحش :)

← في النهاية وضع الزهرة، برجها واتصالاتها هتلعب دور كبير وهتوضحلك قمر الثور هيأثر عليك ازاي، وفي النهاية خريطتك كلها ليها الكلمة الأخيرة لأنك مش بس "قمر ثور" وافتكر دايماً ان مفيش بطل لحكايتك غيرك ف اوعي تخلي حد يحسسك بشئ مختلف. وكالعادة اتمني للجميع يوم مشرق، مبهج وجميل :)


" لا تقلق اذا قلبت حياتك رأساً علي عقب. فكيف يمكنك ان تعرف ان الجانب الذي اعتدت عليه افضل من الجانب الذي سيأتي؟! "



ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

قمرالجوزاء في خريطة الميلاد.

 

. اعتقد مفيش قمر في اي برج اخر او حتي كواكب اخري في برج الجوزاء عندها القدرة انها تتكلم وتتواصل بمهارة شديدة وتنوع وبدون توقف او ملل زي اصحاب قمر الجوزاء! حرفياً مش بيسكتوا وعندهم كمية قصص مش بتخلص. قمر الجوزاء في كافة واي كوكب اخر يقع في برج الجوزاء في كافة تانية، مفيش مقارنة.

. قمر الجوزاء هوائي محكوم بعطارد ف من البداية كده هيخطفوا قلبك ومهما كنت تقيل هتضعف قدامهم ومش كده وبس عندهم قدرة علي التواصل مع اي حد مهما كان سواء طفل، عجوز مش بيغلبوا ودي في حد ذاتها مهارة صعب تلاقيها مثلاً في القمر الناري بكاريزماته او الترابي بجاذبيته او المائي بحنيته.

. أولاً الشخص هنا بيكون اجتماعي جداً ومن صغره بيعرف يخلق صداقات، نشط مع اخواته او عنده قرايب كتير يعني هتلاقي ان محيطه الاجتماعي غني وحتي لو هو مش اجتماعي او متكلم للغاية هيعرف يسلك ويتكيف لأنه مرن والاهم عنده فضول وده اللي بيحركه وبينمي من مهاراته بشكل كبير.

. قمر الجوزاء مش شرط يخلق شخص بموهبة صارخة او ثراء فاحش او كاريزما عالية والملفت انك هتلاقي ان ده مش فارق معاهم ولا بيمثل عائق بالعكس هتلاقي عنده حياة اجتماعية رائعة وروتينه جداً متنوع وحرفياً اللي عايز يعمله بيعمله وده بيخلي ناس كتير هتتجنن منهم لان ببساطة قادر يجرب ويشبع فضوله.

. انا بشوف ان "الذكاء" يكسب اي حاجة ولذلك قمر الجوزاء دايماً كسبان وده لأنه مش بس بيعتمد علي ذكائه لكن بيوظف الذكاء ده صح وفي مصلحته ومن هنا بتبدأ تلمس دهائه الحقيقي لأنهم بيحبوا يرواغوا حتي لو بهزار لازم يتوهك الاول فهما مش سهلين اطلاقاً ونوعهم بيحب يشوق اللي قدامه فصعب تفهمه!

. قمر الجوزاء صاحب صاحبه بجد، بيحبوا اصحابهم وعندهم اصحاب كتير في الاغلب وهتلاقي عنده كل الاخبار ومش كده وبس احياناً المعلومة بتيجي لحد عنده بدون ما يبحث عنها ولذلك لو عايز تعرف اي معلومة او قصة او نصيحة او رأي بشأن شئ معين عليك وعلي قمر الجوزاء دي لعبتهم.

. قمر الجوزاء جداً يقظ وعنده طاقة ذهنية عالية وذاكرته قوية للغاية وقدرته علي ربط الاحداث رائعة فهو مش محتاج منك معلومات كتير انت بس تقوله خيط بسيط او جزء من الحكاية وهو هيقولك كل حاجة وهيتوقع لك كمان اللي هيحصل لو حابب وفي الاغلب توقعه هيكون صح وده اللي هيجذبك ليه.

. قمر الجوزاء بسيط وطاقته شبابية جداً ودي حقيقة لكن الشخص بيكون معقد لأن مفهومه للحياة ولمشاعره مزدوج او مبني علي عدة معايير فالشخص مش بيعرف ينتمي لأي شئ بشكل كلي ونظرية الولاء والتقديس مش في قاموسه لأنه عايز يجرب، يتعلم، يحب عنده ولاء للفكرة ذات نفسها ومش للشخص او الشئ.

. وده التحدي اللي سهل يواجه قمر الجوزاء في علاقاته انه بيبقي جميل وظريف في البداية بس بعد كده العلاقة بتكبر وهو بيرفض يكبر معاها مش لأنه خاين او مراوغ او كذاب لأنه رافض الفكرة ومش حابب ينتمي لشئ او لشخص فيقوم طالع يجري في احضان علاقة اخري تثير فضوله واول ما تكبر يجري تاني وهكذا.

. ومن هنا بتعرف ليه قمر الجوزاء علاقاته متعددة واغلبها سطحية، يعرف كل الناس وعايش في دماغهم بس محدش بجد يعرفه ولو حد حاول هو هيرفض ويختفي. وفي خريطة الست التحدي ده تاثيره بيكون اقل عن لو كنا بنتكلم عن خريطة رجل لأن عادةً المكان ده بيتعب الرجل اكتر من الست ووضع عطارد هنا بيفرق.

. خفة الدم، قدرتهم علي اثارة الرأي العام، شقاوتهم، قمر الجوزاء صعب تقاومه بجانب انهم جذابين للغاية خاصةً لو قمرك بيقع في اول ١٠ درجات بس كمان طاقة مش سهلة خاصةً لو الشخص وعيه مش عالي او سنه لسه صغير لأن فعلاً ممكن يعمل مليون حاجة عشان يهرب فيها من الاستماع لصوته الداخلي.

. لو انت قمرك في برج الجوزاء لازم تعرف ان مهما حاولت تهرب من نفسك في خروجات او سفريات او مع اصحابك لازم في يوم هتفضي وتبقي لوحدك، اعمل ده بدري وتقبل التنوع اللي في شخصيتك بدون ما تراوغ وتبحث عن مليون طريقة عشان محدش يحكم عليك او يزعل منك، عيش بحرية بدل ما تدعي انك حر. 

← في النهاية مهم تشوف وضع عطارد في خريطة ميلادك لأن من خلاله هتعرف قمر الجوزاء هيأثر عليك ازاي. وتأكد ان خريطتك كلها ليها الكلمة الأخيرة وصعب من مكان واحد تحكم علي نفسك. وافتكر دايماً ان وحدك بطل حكايتك وان مفيش بطل لحكايتك غيرك. وكالعادة اتمني للجميع ليلة جداً رائعة وجميلة :) 



ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

قمر السرطان في خريطة الميلاد.

في البداية لازم تبقي عارف ان قمر السرطان: 

. بيحب بسرعة 

. بيعبر عن مشاعره ببطء 

. مش بيفتح قلبه لأي حد

بعد ما وضحت النقط دي يلا نبدأ القمر بيحب يكون في برج السرطان لأنه ببساطة قاعد في بيته بالبيجاما ف مفيش ضغط عليه وعشان كده هتلاقي الشخص مريح، بسيط، عنده قبول عالي وذوق.

. الشخص اللي قمره في برج السرطان هتنعكس عليه صفات القمر بقوة بغض النظر عن بقية وضع خريطته او كواكبه مش هتفرق لازم هتلاقي عنده غموض، تقلب، تحفظ، ميل للانعزال والتعلق بجانب نزعة الشخص الكبيرة للاهتمام بالاخرين ومساندتهم. شخص مستعد يدعم ويحب ويهتم بدون اي شروط معقدة.

. هنا في نقطة لازم تعرفها عن قمر السرطان وهو اهتمامه الشديد بسمعته ووضعه الاجتماعي وحرصه علي خصوصيته وحياته الشخصية. وبالتالي قمر السرطان مش بيقعد يعيط ليل نهار ويشكي همومه للي رايح واللي جاي كما يقال بالعكس انت عشان تعرف مشكلته وسبب احباطه او زعله لازم تكون قريب وقريب جداً كمان.

. وهنا لازم تعرف ان قمر السرطان مش هيعمل اي حاجة ممكن تؤثر علي سمعته او تأذي وتغضب اي حد من محيطه، اهله والمقربين. وده اللي بيخليه "مقبول" اجتماعياً ومحبوب لأنه بيتصرف وبيتعامل طبقاً للاصول، طبقاً للي اتربي عليه، طبقاً للي بيئته بتشوف انه صح حتي لو هو شخصياً مش مقتنع بالصح ده.

. قمر السرطان حريص جداً زيه زي قمر العذراء في اختياراته الفرق ان العذراء هيختار بعقله لكن السرطان بقلبه وعشان قمر السرطان يختارك لازم تمضي الاول معاهدة دولية مع قلبه ويختبرك شوية ويدلع عليك عشان يشوف هتستحمله ولا لأ وبمجرد ما بتنجح بيقفل عليك وبيهرب بيك في عالم مختلف تماماً.

. الفرق بين قمر السرطان واي قمر مائي تاني، ان قمر السرطان عايز "يطمئن" عايز ياخد الامان منك وبمجرد ما ياخده خلاص هتشوف منه احلي حب ودلع واهتمام واحلي ايام واللي ماتحبش من قمر سرطان عمره ما اتحب بدون مبالغة وده عكس قمر العقرب اللي طول الوقت هيشك ويختبر والحوت اللي هتفضل تخمن معاه.

. بس في النهاية قمر السرطان قمر مائي وبيتكلم بلغة المشاعر والاحاسيس فهو محتاج يحس انك بتحبه لشخصه وانه مرحب بيه في كل حالاته اللي مش دايماً رائعة افتكر انه متقلب ساعات طاير في السما وساعات مش قادر يقوم من الأرض. فلو انت قللت من مشاعره او وضعه لأي سبب هيفضل فاكرها ليك للأبد!

. الذكريات هي الهوا اللي بيتنفسه قمر السرطان بيفتكر كل المشاعر اللي حس بيها معاك او بسببك سواء ايجابية او سلبية حتي لو نسي المواقف بتفاصيلها مش هينسي احساسه ساعتها وعشان كده سهل لما تشوفه تفتكر حاجة قديمة، مرحلة من حياتك عدت حتي لو ماتكلمش. مع قمر السرطان لازم تحس بنوع من الحنين.

. علاقات قمر السرطان زي مزاجه متقلبة ومن وجهة نظري التحدي اللي عندهم مش بيتمثل في ايجاد الحب او التعبير عنه ولكن التحدي في "ايجاد الشخص المناسب" لأن قمر السرطان بيعرف يحب ويتحب وعنده كل المقومات تقدر تقول بس ينقصه الشخص المناسب او الصح. فسهل يقع في غرام كذا شخص غلط في البداية.

. قمر السرطان معرض لكسر القلب ومعرض ان يفتح قلبه للاشخاص الغلط بس الاكيد ان لو ده حصل هيطلع من العلاقة ويقفل قلبه للابد لحد ما يلاقي الشخص الصح ودي حاجة بتمثل تحدي احياناً لأن في اسوأ الظروف قد يتحول الوضع "لأزمة ثقة" ويقفل علي نفسه ويفقد قدرته ع الحب والعطاء اللي كانت بتميزه.

. حساسية قمر السرطان مش دايماً بتدعمه وخاصةً في صغره لأن حبه واهتمامه بالاخرين بيدفعه دايماً لنصحهم وارشادهم وبيتحول "لماما" اللي بتقولك كلم ده وابعد عن ده وبلاش تاكل برا تعالي في اكل في البيت وهكذا. فخوفهم الزايد سهل يتعبهم ويتعب اللي معاهم لو مستقلين بزيادة او بيحبوا مساحتهم.

. القلب دليل الانسان وقمر السرطان يمتلك قلب جميل وكبير فمهما تقلبت علاقاته وساءت اوضاعه قلبه هيدله وهتتحول وتتغير بكل سهولة. قمر السرطان في النهاية بيلاقي الشخص المناسب وبيعرف يحط حاله في اماكن ووسط ناس شبهه، ف هتلاقيه دايماً في مكانه وسط اهله او ناس قريبة منه بيحبها وبتحبه.

← أنا بموت في قمر السرطان ف هااي ممكن نبقي اصحاب. في النهاية خريطتك كلها ليها الكلمة الأخيرة لأنك مش بس قمر سرطان وافتكر دايماً ان مفيش بطل لحكايتك غيرك وان امكانياتك وفرصك غير محدودة وكالعادة اتمني للجميع يوم مشرق، مبهج وجميل :)




أنت اجمل من انك تكون الخيار التاني لأي شخص او خطة ثانوية ومش اولوية، واجمل من انك تكون مجرد حبيب في السر او الخيال. انت تستحق تحب وتتحب بصوت عالي واللي يخاف يعترفلك بحبه ويقولك بحبك ماتخفش تطلعه من حياتك وتتخطاه.. 




ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

قمر الأسد في خريطة الميلاد.

. بدايةً كده لازم تعرف ٣ حاجات عن قمر برج الأسد قبل ما نبدأ: 

١. رومانسي بشكل مبالغ..  

٢. بيثق في الناس بسرعة وبيفتح قلبه اسرع..  

٣. بيحب الحياة، بيحب نفسه وبيحب الشمس..   

قمر الأسد بسيط جداً من اول مرة هتقابله فيها هتعرف كل حاجة عنه، شخص دافي وممتع لأقصي درجة.

. قمر الأسد يمتلك ميزة رائعة وهي مصداقيته، ف هنا مشاعر الشخص شفافة جداً فهتلاقي دايماً الشخص بيتكلم عن نفسه وحياته ومشاعره بصراحة وجرأة كبيرة ومش هيتكسف يقول الوحش قبل الحلو عكس قمر السرطان اللي بيحب يحمي نفسه بسبب حساسيته. قمر الاسد منفتح وبيكره يحس انه مقيد بسبب غلطة. 

. قمر الاسد محكوم بالشمس فعنده ولع بالحياة وبيكره الكبت والانتظار والتردد وهتلاقيه دايماً بيبحث عن شئ كبير وجديد ولذلك يعتبر قمر متطلب جداً عاطفياً وفي اسوأ الظروف "زنان" لأنه مش هيقبل تحت اي ظرف انه يخسر فرصة كان ممكن يستمتع بيها وبالتالي الشخص هنا بيحب يشتري سعادته وراحته.

. قمر الاسد في النهاية ناري فطبيعي يكون في انانية بس اللي بيميز القمر ده مع ذلك قدرته الكبيرة علي العطاء في المقابل لأنه مؤمن بالمشاركة والتواصل واهمية الغير في حياته وبالعكس احياناً بيتم استغلالهم بس "بمزاجهم" ونحط مليون خط تحت بمزاجهم لأن الشخص هنا مش هيعمل اي حاجة غصب عنه!

.  قمر الأسد علي فكرة يسهل خداعه بأسم الحب والمضحك هنا ان هو اللي بيخدع حاله ومش الناس هي اللي بتخدعه. فهتلاقيه اول ما يحب يبدأ يبالغ ويسخن قوي ويتخذ خطوات كبيرة وجريئة لدرجة ان الطرف الاخر يصعب عليه مواكبته فتحس ان الطرف التاني اتعمي من كتر حب الأسد ومشاعره وحركاته.

. مشكلة  قمر الأسد تتلخص في انه بيحاول بزيادة وبيفخم الامور، لو هتسألني هقولك دي ميزة لأن حلو تكون مع شخص معبر قوي كده وصادق يعني لو بيحبك الدنيا كلها هتعرف وهيوصلك ده بكل الطرق ولو بيكرهك فالناس كلها هتعرف بلا استثناء. فنظريات المؤامرة والترقب والانتظار دي مش في قاموسهم خالص.

. قمر الأسد زي قمر الثور بيحب الجودة وهنا بيظهر جانب معقد من شخصيته وهو انه مش هيقبل بأي حاجة او بأي حد ومهما حاولت تقنعه دماغه ناشفة وطول الوقت عايز حاجة تبهره بس هو مش صبور زي قمر الثور ولا هينتظر فلو البريق راح خلاص هو كمان هيروح وانسي انه يرجعلك حتي لو عايز بسبب كبريائه!

. عكس المشاع قمر الأسد جداً حساس ونفسه عزيزة وكبريائه نقطة ضعف ونقطة قوة علي حسب الموقف اللي بيمر بيه. الشخص هنا صعب يكون حيادي وهتلاقي جزء منهم عنده انحياز لفرد من اسرته، لصديق معين، لفريق بيشجعه او لطفل من اطفاله. دايماً هتلاقي مشاعرهم منحازة لحد غصباً عنهم وده شئ طفولي شوية.

. قمر الأسد مش بيقدر يتحمل الاهانة ولا النقد لأن هو فخور جداً بنفسه وبمشاعره وعارف كويس انه يقدر يقدم كتير ف بالتالي مش بيتقبل النصيحة من اي حد ولازم تكون ذكي كفاية ولبق عشان يتقبلها منك لأن جزء منهم بيحس ان انتقادك ليه او تجاهلك هي اهانة لشخصه فبيبدأ ينحاز لنفسه تلقائياً.

. قمر الأسد اضافة رائعة في الخريطة لأنها دلالة قوية ان الشخص هيدخل تجارب ويغامر وهيخلق لحظات ممتعة لنفسه فحتي لو الشخص منغلق، خجول او جاف وجود القمر في برج مماثل هيضيفله نكهة. عيبهم ان سهل تلاقيهم في علاقات سطحية او علاقات مبنية علي المظاهر لكن مع ذلك قلبهم مش بيتعلق بأي حد.

.  الانسان اللي عنده قدرة انه يسيب قلبه يحركه اكيد انسان شجاع لأن الحياة مش دايماً سهلة واحياناً يصعب الوثوق فيها بسهولة لكن قدرة قمر الأسد علي العطاء والوثوق مرة اخري مبهرة بشكل يجنن. طبعاً صعب الكلام ده ينطبق علي الجميع لأن مهم تشوف وضع الشمس في خريطة الشخص عشان تقدر تعرف.

←في النهاية لازم تعرف ان مفيش بطل لحكايتك غيرك وان خريطتك كلها ليها الكلمة الأخيرة. الحياة مليئة بالفرص والوفرة وطول الوقت في ابواب هتفتح ومعجزات هتحصل لأن الكون في سعادة وحب ورزق ووفرة تكفي الجميع :) 



ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

قمر العذراء في خريطة الميلاد.

 . أكتر حاجة بتميز قمر العذراء عن اي قمر تاني انه عارف اولوياته كويس، بيعرف يميز بين الشئ المهم والشئ الأي كلام وعشان كده يصعب اقناع الأشخاص دي او خداعهم بسهولة وده لأن الشخص بيكون جداً يقظ ودقيق وقدرته علي ربط الأحداث والمعلومات ملفت للنظر، بجانب انهم أصحاب IQ عالي.

.  قمر العذراء بيحب يشوف المشكلة الأول، عينه لازم تيجي علي النواقص والعيوب عشان يحدد اصل الخلل والعيب ويبدأ يشتغل علي ايجاد حلول وعشان كده مش كل الناس بتتقبل طباعهم بسهولة لأن وجوده اغلب الوقت هيفكرك بمشكلة لازم تتحل، بميعاد الدوا اللي نسيته او الكام كيلو اللي تخنتهم بسبب كسلك.

. لو هنتكلم في اطار مثالي فكل واحد مننا محتاج شخص بقمر عذراء في حياته لأن الشخص هنا مش بس بيعرف يحدد المشكلة ده كمان عارف حلها وده لأنه قمر ترابي عملي بيحاول يتعامل مع مشاعره بحرص شديد ف هتلاقيه في ذروة الأزمة اللي كله منهار فيها  قادر يفصل مشاعره بسهولة وبيتعامل بمهنية رهيبة.

. عادةً نظرة قمر العذراء الموضوعية بتدفع الغير للحكم عليهم غلط وتعتبر من الأماكن المعرضة  لسوء الفهم ولكن ده جانب لازم تتقبله وتحاول توظفه صح لأنه رائع ومن خلاله تقدر تقدم خدمات كتيرة للاخرين وتحصل علي الدعم العاطفي اللي بتسعي اليه لأن جزء من سعادتك مرتبط بقدرتك علي مساعدة الغير. 

. لو قمرك في برج العذراء فجزء كبير من شعورك بالراحة والأمان والحب مرتبط بقدرتك علي الانتاج وبالتالي طول ما انت بتنتج، بتشتغل، بتساعد وبتخدم طول ما انت سعيد ومحدش قدك لكن اول ما يتقالك شكراً مش عايزين خدماتك او تحس ان محدش مقدر نصايحك بنبدأ رحلة لوم واكتئاب وانتقاد مش بتخلص.

. ولذلك دايماً بقول ان حل قمر العذراء سواء في خريطة الرجل او الست هو الشغل لأن الشخص هنا محتاج ينتج، ينظم، يعمل. في النهاية ده قمر ترابي محكوم بعطارد يعني لو اتساب للفراغ هيقلب حياته وحياتك دمار شامل وده الشخص اللي عادةً مش بيعرف يقعد في البيت من غير ما يعمل حاجة، يتجنن!

. نقدر نقول ان عدو قمر العذراء هو الفراغ لأن لو الفراغ سيطر علي حياته هنبدأ نشوف الجوانب اللي بيتخاف منها فهتبدأ تلاقيه شديد الانتقاد، مش عاجبه اي اراء غير ارائه، مش مهتم ولا حاسس بمشاعرك ولا هيحس، طول الوقت شايف انه صح وانه بيتعب اكتر منك ومع ذلك انت غير مهتم، فوضوي ومهمل والخ.

. قمر العذراء بيعرض الشخص لطفولة وبيئة عملية بنسبةً ما يعني بتلاقي الشخص نشأ في محيط ملئ بالقواعد والانظمة واغلب الوقت في تركيز علي الصح والغلط  ولذلك اغلب الاشخاص دي مش تلقائية وهتلاقي عندهم نسبة ادراك و وعي عالية علي تصرفاتهم وردود فعلهم وجداً مهذبين وعندهم سلوكيات.

. من تحديات قمر العذراء انه مش بيعرف يكون ع راحته وتلقائي وده لأنه بيفكر كتير وبيركز علي شئ واحد بدل ما يركز علي الصورة الكبيرة وده اللي بيخلي حياتهم فوضوية وقد تتخيل ان الفوضي والعذراء شئ مستحيل ولكن ده مش حقيقي لأن تركيزه علي التفاصيل بينسيه باقي الجوانب ومن هنا بتبدأ الفوضي.

. قمر العذراء معرض للانتقاد والاستغلال اكتر من غيره لأن اغلب الأشخاص دي تقديرها لنفسها مش عالي ورابطة التقدير ده بقدرتها علي المساعدة ومقتنعة ان خدمة الغير واجب حتي لو علي حساب نفسها فممكن يقعد سنين يحاول يساعد ويخدم ويصلح من حياة الناس الغلط او ينجذب للاشخاص المحتاجة مساعدته.

. قمر العذراء محتاج يتعلم ان مسؤولية انقاذ الغير مش بتاعته خاصةً  لو عندك كواكب في الدلو او الحوت مع القمر ده وان الهدف هو انك تحسن حياتك وبالتالي ابعد نفسك عن الاشخاص اللي بتعيشك في ضغط طول الوقت وبتحسسك ان اللي بتعمله عادي او مش كافي لأن دي اشخاص عايزة الحرق وانتوا قمرات. 

← وكالعادة خريطتك ليها الكلمة الأخيرة ومفيش بطل لحكايتك الغير :) طبعاً الكلام صعب ينطبق علي الجميع بشكل حرفي نظراً لطبيعة كل خريطة فكيف الكلام بنوع من المرونة عزيزي القارئ.


ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

قمر الميزان في خريطة الميلاد.

 




. في البداية  قمر الميزان من أقوي دلالات الجمال في خريطة الميلاد وعادةً دي نوعية الأشخاص اللي بيتم الاتفاق علي جمالهم بشكل كبير وخاصةً في محيطهم بيبقي الشخص معروف بجماله، لباقته، ستايله حتي لو دمه يلطش هيتقال عليه "جميل" وفنانين كتير مشهورين بجمالهم هتلاقي عندهم قمر ميزان.

. لو هتسألني بشكل شخصي هقولك مكان خطير قوي للقمر وعايز خريطة  بتدعمه لأنه يا يريحك يا يحيرك مفيش وسط. أولاً اغلب الاشخاص دي حياتها الشخصية بيكون فيها نسبة تناقض وتطرف يعني الشخص هنا بيجرب الحلو والوحش في نفس الوقت عشان كده ردود افعاله تجاه الحياة متزنة ومنطقية لأنه جرب الوجهين ف عارف!

. من أكتر الاشخاص اللي بتتعرض للظلم هما اصحاب قمر الميزان و مش شرط يتعرض للظلم بشكل مقصود بس ممكن ظروفه ومحيطه يظلمه يعني تلاقيه نشأ في محيط منحه خيارات كتير بس مش بيساعده مش بيشجعه زي لما ترجع تعبان وتلاقي الوالدة بتقولك عندك الاكل في التلاجة يعني موجود بس انت شوف هتعمل ايه.

. فاغلب الوقت مع  قمر الميزان هتلاحظ  النغمة بتاعة عندك الحاجة كلها قدامك شوف انت هتختار او هتعمل ايه براحتك. وخد بالك دي مش حاجة سلبية بالعكس دي حاجة بتمنحهم مساحة كبيرة وخيارات متنوعة بس بتظلمهم احياناً لأنهم طول الوقت محتاجين يختاروا ودي نقطة ضعفهم ومن هنا بنعرف ليه بيهتموا بأراء الأخرين. 

. قمر الميزان هو ابن الزهرة في النهاية زي اخوه قمر الثور؛ الاتنين ردود فعلهم لبقة، عندهم لطف، نظرتهم للامور ايجابية، هوسهم بالجمال كبير ولكن الفرق ان قمر الميزان عايز حد يشاركه حلاوة الدنيا لكن قمر الثور عايزاها ليه لوحده حتي لما يحبك هيعتبرك بتاعه عكس قمر الميزان الاكثر مرونة.

. بشكل عام القمر الهوائي يمتلك جاذبية كبيرة صعب تقاومها والأكثر جاذبية  بدون اي انحياز؛ اصحاب الاقمار الهوائية ويكسبوا الناريين كمان ومع ذلك هتلاحظ انهم اكتر ناس بتواجه مشاكل في علاقاتهم حتي قمر الميزان المعروف بمهاراته الاجتماعية هتلاحظ انه بينجذب لعلاقات غير مناسبة احياناً.

. قمر الميزان ثقته بنفسه عالية هو عارف انه حلو وعارف انه يقدر يسحرك وعارف انت معجب بيه قد ايه بس هو مش بيرتاح غير لما يحس بده من اللي حواليه لو افتقد "التأكيد" ده من محيطه هنبدأ نشوف الوجه الاخر وهو وجه سطحي بيحاول يتعرف علي اي حد عشان يسمع كلمة حلوة او مجاملة اي كلام وهكذا.

. ولذلك  قمر الميزان بيشارك قمر الأسد في احتياجه الدائم للاهتمام بس الفرق ان الميزان خجول ف مش هيجي يقولك "حبني" او اهتم بيا بالعكس هيقعد يراوغ ويعمل حركات مش مفهومة لحد ما انت تنتبه  وتصارحه او تواجهه يقوم هو عامل نفسه مش مهتم  بمجرد ما يحصل علي "التأكيد" منك خلاص هو اتكيف.

. من اذكي والطف الأشخاص اللي ممكن تتعامل معاهم هما قمر الميزان لأنهم بيعرفوا يعبروا عن مشاعرهم اينعم مش بطريقة واضحة زي قمر الحمل بس طريقته غير لأنه عارف ايه  اللي هيبسطك، ايه اللي هيخليك تضعف وبيعمل ده بحرفية شديدة ومهتم انك تلاحظ مشاعره وتلمحياته، دول ملوك  التلميح.

. لازم تعرف ان قمر الميزان مش ضعيف ولا تابع لحد لأن احياناً لطافة الاشخاص دي بتظلمهم وبتخلق عند البعض احساس انهم مش بيعرفوا يتصرفوا او انهم كيوت وهيسكتوا علي حقهم وده مش حقيقي لأن قمر الميزان لو حس انه اتظلم او هيتظلم هيتحول حرفياً وهتشوف منه ايام سودا من غير ما يطلع في الصورة.

. يمكن التحدي اللي بيواجه قمر الميزان هو احتياجه القوي للعلاقات بس في نفس الوقت رفضه الدائم للارتباط وهنا بيظهر العنصر الهوائي في نقطة انه حابب فكرة العلاقات بس مش عايز يتورط لأن ممكن يكون في حبيب افضل او صديق الطف وعشان كده هتلاقي جزء منهم بيفتقد وجود علاقات عميقة في حياته.

← مكان مثير للقمر بصراحة ومش عايزة اوقف كتابة بس كمان مش حابة نطول اكتر من كده. وأكيد طبعاً خريطة كل شخص هتختلف وبالتالي صعب ينطبق الكلام علي الجميع فخليك مرن عزيزي القارئ وأفتكر دايمًا إن مفيش بطل لحكايتك غيرك. 





ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

قمر العقرب في خريطة الميلاد.

 







. عزيزي القارئ لازم تعرف عدة نقط عن قمر برج العقرب قبل ما نبدأ موضوعنا: 

١. لو داخل علاقة معاه بنية الهزار و ههههه ونقضي وقت بلاش. 

٢. ماتحاولش تكذب عليه حتي لو ببراءة عشان تبهره او تجذب اهتمامه "ماتعملش جامد" حقيقي بلاش. 

٣. و اخيراً افتكر اني قولتلك "بلاش"..

.  بسم الله الرحمن الرحيم..
عزيزي القارئ المحجور لازم تعرف ان قمر العقرب تحديداً قمر متعدد الوجوه والوجه اللي عايز تشوفه منه معتمد عليك، يعني الشخص منهم بينزل بنسخ، نسخة لطيفة، نسخة عميقة، نسخة بسيطة، نسخة معقدة حقيقي اغلبهم شخصيات "مركبة" جداً و مثيرة للاهتمام.

. أنا بشوف ان اشخاص قمر العقرب  بينقسموا لفئتين: 

. فئة  تمتلك وعي وادراك عالي وعندها تحكم صحي علي مشاعرها و في استخدامها للطاقة..

. و فئة  تانية جداً معقدة و صعبة و بتعاني من ازمة  ثقة كبيرة ولا تجيد التحكم والسيطرة علي مشاعرها.. 

. و فئة  تالتة بتاخد صفات من الفئتين.

.  لازم تبقي مدرك ان قمر العقرب عكس قمرالثور، فلو قمر الثور بيحب يريح دماغه ف قمر العقرب بيحب يتعبها وده مش بيتعبه لأنه بيحب يحس انه في حالة خطر، بيحب يحس انه مهدد لأن قمر العقرب عايز يموت من كتر الاحساس ده اللي بيحسسهم بالامان لكن شغل ترييح الدماغ ده هتلاقيه عند قمر الثور.

. ولذلك هتلاقي ان قمر العقرب عاشق  لقصص الغرام والانتقام واغلب علاقاته فيها نكهة مماثلة ومش كده وبس الفئة المتطرفة منهم ممكن يبدأوا يتعلقوا بالشخص ويتمسكوا بيه في اللحظة اللي بتكون العلاقة انتهت فيها والشخص قرر يمشي وكأنهم بيستمتعوا بعذاب النهايات ودراما انتهاء العلاقة ذات نفسها.

. النسخة الايجابية من قمر العقرب بتخلق شخص لطيف جداً، الطف من قمر الميزان والثور والجوزاء لأن الحلو من الناس دي بيكون حلو قوي والسئ بيكون سئ قوي ف مفيش وسط. ودي نوعية الأشخاص اللي ممكن تحرك جبال وتحارب قبائل وتدمر نفسها وحياتها في سبيل الاشخاص اللي بتحبها وبتهتم بيها.

. قمر العقرب صادق جداً في مشاعره  وتعلقه  بالاشخاص مرتبط بمعايير بسيطة جداً لدرجة انك تنتدهش منه ساعات، كل اللي عايزه الشخص ده "مصداقية" تكون نفسك، تكون حقيقي وعلي فكرة من الاماكن اللي هتحب عيوبك و قبحك اكتر من مميزاتك و حلاوتك لأن المظهر مش بيثيره اللي بيثيره بجد اسرارك.

. المثير للاهتمام ان قمر العقرب يمتلك حماس وتفاؤل عجيب تجاه الحياة وفي اكتر المواقف اللي تحس ان مفيش فيها شئ يدعو للتفاؤل بتلاقيه في قمة تفاؤله وحماسه حقيقي الكوارث والشعور بالخطر بيحركهم. وطول الوقت تحس انه عارف حاجة اكتر من اللي كلنا عارفينها سواء عنك او عن الوضع بشكل عام.

. قمر العقرب سئ  جداً مع اعدائه وصعب يتقبل رفضك او مقاومتك بسهولة بجانب انه منتقم للغاية و مش هيرتاح غير لما ياخد حقه منك والموضوع  بيخرج عن سيطرته احياناً وهو ده عيبهم ان مشاعر الحب القوية تجاهك بسهولة شديدة فيها تتحول لكره وبعدها بيتحول كل شئ بشكل جداً قبيح.

. مشكلة  قمر العقرب انه بيتسرع في حكمه علي الاشخاص اغلب الوقت  وده لأنه مش بيمنح  للشخص مساحة و فرصة  يعبرله عن نواياه و مشاعره، فبيبدأ يختبر اللي قدامه في انتظار ان الطرف التاني يقع و يغلط  ويأكد شكوكه وعشان كده مش بيعرفوا يستمتعوا وبسهولة طاقة الحب بتتحول لطاقة  كره وغضب.

. قمر العقرب بيضع الشخص في  بيئة معقدة و متطرفة بتخليه في حالة شك وترقب فهو بيبحث عن دليل يريحه. سهل تلاقي بعضهم في علاقة مؤذية مع اهله او مر بتجارب صعبة خلقت جواه مخاوف واجبرته علي تحليل وتفسير كل الامور، فهو عايز يعرف سبب حبك ليه وسبب كرهك وهيبحث عن دلائل واثباتات طول الوقت.

. قمر العقرب عنده شغف وقدرة علي الحب  والعطاء كبيرة بس مخاوفه وشكوكه و حبه  للدراما  بيستهلكوا طاقته اوقات كتير. الناس دي مش وحشة ولا مؤذية بالعكس من الطف الاشخاص لو صادفت الفئة الواعية منهم و مفيش شخص في الدنيا هيحب عيوبك ويتقبل ضعفك ومخاوفك زي قمر العقرب فلو كسبت ثقته تبقي كسبت.

. قمر العقرب يمتلك غريزة قوية لأنه نشأ في محيط ملئ  بالمخاطر سواء المادية او العاطفية وغيرها فهو حاصل علي دكتوراه في الجانب المظلم للحياة فيصعب عليه التعامل مع الحياة في اطار بسيط او سطحي ولذلك مش كل الاشخاص تناسب قمر العقرب صعب تتأقلم معاهم ودي حاجة مش بتقلل منهم ولا منك.

. لو قمرك في برج العقرب ماتحاولش تتمرد علي مشاعرك وعلي الناس اللي بتحبك وتعمل فيها الصعب اللي محدش هيعرف يفهمه و يحس بيه لأن ده مش حقيقي و الحياة مش دايماً بالسوء اللي انت متخيله. خلي قدرتك علي رؤية القبح تدفعك لإيجاد الجمال والسلام.. الجمال و السلام يا قمر العقرب. 

← في النهاية خريطتك ليها الكلمة الأخيرة وافتكر دايماً ان مفيش بطل لحكايتك غيرك. الكلام ده صعب ينطبق علي كل شخص بقمر عقرب ولكن كيف الكلام طبقًا لوضعك عزيزي القارئ. 


افتكر دايماً ان في فرق بين شخص بيفتكرك لما يكون فاضي و شخص بيحاول يخلق لك في يومه وقت مع انه مش فاضي. العلاقات اللي فيها تقدير فيها حب. اختار شخص يقدرك لأنك تستحق واتعلم تقدر قبل ما تتعلم تحب.



ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

ا

قمر القوس في خريطة الميلاد.

 





. من أقوي المميزات اللي هتلاحظها في قمر القوس هو سعيه المستمر للتطوير من نفسه، جزء كبير من شعوره بالامان والرضا عن النفس مستمد من قدرته علي التعلم، دخول تجارب واكتشاف افاق جديدة وعشان كده قمر القوس فيلسوف من العيار الثقيل لأنه بيبحث عن ذاته ومعني لحياته في اطار جداً مختلف.

. هتلاقي اغلب الوقت ان قمر القوس بينتمي لفكر معين، مؤمن بنظرية او فلسفة محددة وبيتبعها بشغف ومش كده وبس بيمثلها وبيرشحها لغيره و في اسوأ الظروف قد يتحول لشخص متشدد لأفكاره و نظرياته وفخ "التشدد" ده بيقع في دايماً برج القوس وخاصةً القمر نظراً لإيمانه الشديد بقضيته.

. قمر القوس مش بيفكر كتير زي قمر الجوزاء ف بالتالي مش بيحسبها و بمجرد ما بيحس بشئ معين بيطلع يجري ويشوف هيحققه ازاي ومن هنا بيظهر الطابع الناري للقمر ده ولكن البساطة الشديدة في التعامل دي بتعقد امورهه بشكل كبير وبتضعه في اطار سطحي وسهل تخليه مبالغ في تقديره للمواقف والاشخاص.

.  قمر القوس دلالة علي شهرة وشعبية كبيرة واغلب الاشخاص دي هتتعرض لمحيطات وبيئات مختلفة عنهم او هتدفعهم للتواصل مع مجموعة كبيرة من الشخصيات والطباع المختلفة وده اللي بيضيف للشخص خبرة ومهارة كبيرة وهتلاحظ انه بيعرف يتكيف مع اي محيط او ثقافة مختلفة عنه كأنه مولود فيها ده سهل عليهم.

. خبرة  قمر القوس و فلسفته بتمنحه مصداقية كبيرة ف بيتحول لشخص مقنع بشكل يخوف، في افضل استخدام للطاقة قد يتحول لمرشد وملهم ومحبوب من ناس كتير و في اسوأ استغلال للطاقة قد يتحول لمنافق ومضلل بينشر نظريات غير مؤمن بيها لتحقيق مصالح شخصية وطبعاً ده متوقف علي طبيعة الشخص و وضع خريطته.

. علاقة  قمر القوس بأسرته وتحديداً والدته احياناً بيكون فيها نسبة تقلب. من سن صغير هتلاقي الشخص اتعلم حاجات كتير او كان في اسرة بتشدد علي اهمية التعليم والحصول علي مؤهل عالي. بجانب ان حياتهم غير مستقرة ف مش هتشوف عنصر التكرار والنمطية الواضح مثلاً مع قمر العذراء والثور.

. علاقة  قمر القوس مع والدته مش دايماً الأفضل وخاصةً لو القمر اتصالاته سلبية هتلاقيه بيحاول يبحث عن نموذج مختلف "للام" في حياته وممكن بدون سبب او ادراك منه يخلق مسافة بينه وبين والدته وطبعاً مش كلهم ولكن جزء منهم وهنا بيتفقوا مع قمر الدلو في عدم انتمائهم بسهولة للمقربين منهم.

. قمر القوس يمتلك ميزة يفتقدها الجميع وهي انه دايماً مستعد للمستقبل، مستعد للقادم، للأبواب اللي ممكن تتفتح وفي انتظاره وده عادةً بيتشاف جنون و تفاؤل مبالغ والبعض هيقولك ده استهتار وقلة عملية بس هو ده "سر" قمر القوس انه متأكد ان في حاجة كبيرة جداً هتحصله وفي طريقها اليه.

. تفاؤل قمر القوس بيخليه عارف يستمتع باللحظة وكمان متحمس لللحظة اللي بعدها وعشان كده نظرته للمستقبل مختلفة جداً عن نظرة الجدي والعذراء و الجوزاء اللي فيها تعقيد وحسابات كتير ويمكن لذلك يعتبروا محظوظين لأنهم لو فشلوا بيجربوا تاني. بجانب ان قدرتهم علي الجذب جداً عالية.

👈 قصة جانبية: اختي قمرها في برج القوس والوحيدة من اخواتي ومن سن صغير جداً كانت مهووسة  بكتابة الامنيات وقانون الجذب والمثير للاهتمام ان كل ما كانت تتمني حاجة او تقول نفسي في كذا بعدها بيوم يومين وساعات في نفس اليوم تحصل عليها و هي في قمة سعادتها وده بيمثل طاقة قمر القوس احياناً.

. بعيداً عن نقطة  "الحظ" المرتبطة بطاقة  القوس بس الناس بتحب قمر القوس، بتحب تساعده، بتحب تشجعه يعني اغلب الاشخاص دي بتلاقي دعم في نطاق واسع وذكائهم بيدفعهم  للتواجد في اماكن وبيئات ممكن تدعمهم وتلهمهم وعشان كده بنقول عليهم محظوظين لأنهم منفتحين وبيسعوا للنمو ومش بس للنجاح المادي.

. علي المستوي العاطفي قمر القوس خيالي ورومانسي زي الحوت لكن واقعي ودقيق في اختياراته زي العذراء ومتردد وتايه زي الجوزاء في اخذ القرار. حياتهم العاطفية محتاجة مقال مستقل ولذلك مش هتعمق فيها بس تأكد ان قمر مماثل هيحتاج يكون مع شخص يلهمه ويدفعه للتعلم واكتشاف كل امكانياته.

← كالعادة  الكلام ده  مش هينطبق علي كل قمر قوس تعرفه لأن كل شخص خريطته معقدة وليها تركيبة خاصة بيها؛ فحاول تكون مرن مع المحتوي عزيزي القارئ وتأكد ان مفيش بطل لحكايتك غيرك.  





ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

قمر الجدي في خريطة الميلاد.

 . اللي بيميز قمر الجدي عن اي قمر اخر انه يمتلك نوع من الصمود والثبات تخليك تشعر ان مش ناقصه حاجة، استحالة القمر ده يطلب مساعدة او يحسسك بأحتياجاته او نواقصه وده مش غرور ولا برود دي "حساسية" يا عديمي الاحساس والكلام ده لكل شخص بيظلمهم او بيحكم عليهم غلط واه يا جماعة منحازة ليهم.

. اللي هتلاحظه مع قمر الجدي ان الشخص من سن صغير بيتم اعداده علي تحمل المسؤلية حتي لو الموضوع بيحصل بشكل تلقائي، زي انه يكون اكبر اخواته ومجبر ياخد باله منهم، اسرته بتشتغل وهو مجبر يعتمد علي نفسه من سن صغير. هتلاحظ ان حياته ومحيطه فيهم نوع من الجدية وهو مجبر علي الإلتزام.

. قمر الجدي بيخلق شخص واعي من سن صغير وهتلاحظ ان بسبب بيئته بينشأ علي قواعد يصعب كسرها بسهولة وعشان كده بنشوف الاشخاص دي صارمة الي حد ما سواء كانوا رجال او نساء. ومن هنا بنعرف التحفظ ده مصدره ايه وليه صعب يبقي الشخص منفتح بشأن احتياجاته الشخصية وعواطفه وتجاربه بشكل عام.

. قمر الجدي بيضغط علي نفسه و يمكن اكتر قمر قاسي علي نفسه والقسوة دي احياناً بتكون نتيجة قسوة الغير تجاهه او بسبب قسوة الظروف اللي نشأ فيها ف هتلاقي ان الشخص مايعرفش يشتكي ولو اشتكي محدش يتعاطف معاه بسهولة بالعكس ممكن يتلام من قبل الغير ويتم انتقاده ومن هنا بيتعلم يكبت احساسه.

. مش كل قمر جدي بينشأ في محيط قاسي او بتكون ظروفه صعبة ولكن الشخص من سن صغير ملزم بتحقيق طموح اكبر منه، عليه التزامات اكبر من سنه حتي لو عنده ٤٠ سنة هتلاقي نسبه تحمله عالية والتزاماته كبيرة وبالمناسبة الشخص مهيأ لأوضاع مماثلة ف هتندهش من قدرتهم علي التعامل مع الازمات "جبابرة".

. من وجهة نظري  طموح  قمر الجدي مماثل لشغف الناريين. الشخص مش بيستسلم غير لما يوصل والمميز ان عندهم قدرة سيطرة علي مشاعرهم جبارة. فالشخص مستعد يضحي "براحته" في سبيل الوصول لطموحه ودي حاجة صعب تلاقيها في قمر ترابي اخر زي الثور اللي بيفضل راحته او قمر العذراء اللي سهل يتردد.

.  قمر الجدي مش بيتردد، مشاعره ثابتة، لو بيحبك فهو بيحبك ودي مش محتاجة نقاش كتير او تقديم اثباتات وادلة ولذلك لا تتوقع انه يعبر بالكلام ولكن "افعاله" كافية ولو بيكرهك ف بالتوفيق لو عرفت تغير مشاعره تجاهك ولذلك بيتشافوا صعبين او باردين لأن مش اي حد هيحرك مشاعرهم بسهولة او بسرعة.

. قمر الجدي بيكره الدراما ومش بيعرف يتعامل مع المواقف اللي بتتطلب كلام عاطفي او كلام مستهلك. وبيشترك مع قمر الدلو في البحث عن شخص يتمتع بأصالة وبيعرف يتحمل مسؤولية نفسه ف بينجذبوا للطموحين والناجين اجتماعياً ويهموا يرتبط بشخص ناجح او بيدعم طموحه ومكانته ولو مفيش مش هيرتبط.

. صعب ننكر ان قمر الجدي معقد وبالرغم من حبه ليك الا انه مستعد يكسر قلبك لو شايف ان ده الصح وان ده في مصلحة العلاقة او الموقف بجانب ان قمر الجدي متطلب جداً بس صعب تكتشف ده في البداية فهو طول الوقت راسم ليك "دور" في دماغه فهتبقي توقعاته عالية ومنتظر منك اداء قوي لا يخيب توقعاته.

. في النهاية صعب تلاقي شخص يمتلك جدعنة قمر الجدي ودي اكتر حاجة بحبها فيهم انهم بيعرفوا يقدموا خدمة ليها قيمة للاخرين وبيهتموا بيك من خلال اشباعهم لأحتياجاتك بجانب ان الشخص بيكون محب جداً لأسرته ودايماً حاسس بمسؤولية او التزام تجاههم مهما اختلفوا ولذلك يعتمد عليهم وموثوق فيهم.

.  قمر الجدي لو ساب نفسه شوية وقلل من قسوته علي حاله وتحفظه هيرتاح، احياناً تقدير بعض الأشخاص دي لنفسها بيجي في سن كبير او في وقت متأخر ف اتمني انكم تسهلوا الامور علي نفسكم لأنها مش مستاهلة. و اوعي تخاف من مشاعرك لأن حبك عمره ما هيكون نقطة ضعف لكن كبتك للحب ده هو اللي ضعف.

← كالعادة خريطتك ليها الكلمة الأخيرة ومفيش بطل لحكايتك غيرك. الكلام ده مش هينطبق علي كل قمر جدي عزيزي القارئ، ولكن حاول تاخد منه اللي بيمثلك. وافتكر دايماً ان الكون في سعادة وفرص تكفي الجميع. 





ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

قمر الدلو في خريطة الميلاد.

 





. عشان ننهي اي فرصة للجدل واثارة الشائعات يا جماعة قمر الدلو مش بيحب الوحدة ولا هو قمر انعزالي دول مهوسيين بالعلاقات والتواصل الموضوع ببساطة ان قمر الدلو مش بيخاف يكون وحيد ولا بيخاف يستمتع بعزلته ووقته فبيعرف امتي ينسحب وامتي يكمل او يستمر. وبكده ممكن نبدأ كلامنا بحب..

. قمر الدلو منطقي ومش بيحب حياته تقف علي وضع معين او شخص ما او علاقة في حياته وبالتالي لو هتخيره بين الاستمرار في علاقة او صداقة فاشلة وبين انه يبقي وحيد عايش في قوقعته، بأعلي صوت هيقولك "قوقعتي" وده مش معناه انه بارد او اناني لكن ببساطة مفيش حاجة ممكن توقف نموه او تقيده.

. لو قمر السرطان محتاج يحس بالأمان ف قمر الدلو محتاج يحس بحريته. القمر ده عايز مساحة، عايز يحس ان عنده وقت يفكر، يحلل، يجرب لو قدرت تمنحه المساحة دي حرفياً أنت كسبت صديق لا يعوض وحبيب يصعب تكراره. ولو عايز تضمن وجود قمر الدلو في حياتك سيبه يختارك مش تجبره علي اختيارك. تفرق!

. من مميزات قمر الدلو انه بيعرف يسمع، بيعرف يمتص الحدث ويحلله ودي حاجة بتخليه بيعرف يحط نفسه مكان اللي قدامه ويبدأ من هنا يتعاطف معاه ويفهم عليه ولذلك هتلاقيه بيعرف يتواصل مع كل الناس من كل الفئات والاعمار والطبقات بدون ما يهتم لأراء الاخرين وده بيمنحهم شعبية كبيرة جداً.

. المثير للاهتمام ان قمر الدلو اغلب الوقت عنده معارضين او بيواجه معارضة فهو محتاج يدافع عن قضيته، عن موقفه وعن انتمائه لقناعاته. جزء منهم بيتعرض للتنمر، بيتعرض للاهمال والتجاهل وطبعاً مش كلهم بس هتلاحظ ان اغلبهم اتعرض للظلم او الاضطهاد في مرحلةً ما وده بيدفعهم للدفاع عن الاقلية.

. أي شئ يبدو جنوني ليك هو طبيعي جداً بالنسبة لقمر الدلو قدرتهم علي تقبل نفسهم زي ما هما بتمنحهم ثقة كبيرة بالنفس وكمان مصداقية وعشان كده الشخص بيعرف يعترض، بيعرف يقول لأ، بيعرف يقف ويقول مش لاعب لأني مش معجب ولا مقتنع باللي بيحصل، صعب تضمنهم. الجنون ليهم هو عين العقل!

. قمر الدلو عكس قمرالأسد في النهاية فالشخص مش مبالغ ولا توقعاته عالية هو بيحاول يكون منطقي طول الوقت ولذلك الشخص مش معبر للغاية هو بيعرف يسمع لكن مش بيعرف يتكلم، فاهمك بس مش قادر يفهمك نفسه عشان كده ممكن تحسه كائن فضائي او شخص معزول لأن انت مش قادر تاخد منه اي اشارات مفهومة.

.  التحدي اللي بيواجه قمر الدلو متعلق بخوفه ليتحول لكل شخص اعترض علي اسلوبه او كره تصرفاته، قمر الدلو بيخاف يكون "عادي" بيخاف تتحول حياته وخياراته لنسخة من حياة وخيارات شخص ممل او عاجز و عشان كده بيخاف يبالغ في مشاعره بيخاف تعلقه بيك يقيده ويحوله للشخص اللي مش عايزه.

. بالمناسبة قمر الدلو شديد التعلق وبيفتكر الاشخاص للأبد ولكنه بيكره الدراما ومؤمن ان المستقبل يحمل ليه العديد من الفرص وان تمسكه بالوضع الحالي حتي لو مريح هيقيده بشكل او بأخر ولذلك بيتحدي حاله طول الوقت وبيبحث عن تجارب مثيرة وجديدة ومن هنا بيحصل علي فرص جديدة وبيتطور.

.  قمر الدلو بيعرف يصدم اللي قدامه، ردود فعلهم مدهشة لأنها غير متوقعة وممكن يصدمك بصراحته أكتر من قمرالقوس وده لأن الشخص مش بيحب يدعي مشاعر مزيفة ولا هدفه انه يبهرك زي قمر الاسد مثلاً هو عايزك تتقبله زي ما هو لأن هو متقبلك زي ما انت. بسيطة!

. مشكلة قمر الدلو انه بيخاف من الاهتمام، بيخاف يكون كل التركيز عليه وده اللي بيدفعه لعزل حاله او التشديد علي عدم "اهتمامه" بشئ او بشخص خاصةً لما حد يحاول يواجهه او يسأله ومع ذلك من اكتر الاشخاص اللي محتاجة اهتمام بس صعب تعترف بده بسهولة الا لو عندها كواكب نارية الوضع هيختلف.


← الكلام عن قمر الدلو يطول ولكن هنقف لحد هنا وكالعادة خريطتك ليها الكلمة الأخيرة ومفيش بطل لحكايتك غيرك، طبعاً اكلام ده صعب ينطبق علي كل شخص بقمر دلو ولكن حاول تكيف الكلام طبقاً لوضعك عزيزي القارئ.




"… إذا أردت شيئاً بشدة فأطلق سراحه فإن عاد إليك فهو ملك لك للأبد وإن لم يعد فهو لم يكن لك من البداية …"




ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

قمر الحوت في خريطة الميلاد.

 

. وأخيراً وصلنا لأخر حلقة وختامنا مع قمر الحوت اللي بيكره النهايات، بيكره الحدود ومش بيحب يدقق هو عنده مليون سبب يخليه يحبك ومليون سبب يخليه يكرهك فبلاش تقوله حدد او قول سبب واحد او حتي تطلب منه يخلق نهاية لأي وضع في حياته. تسمع عن النهايات المفتوحة؟ دي المفضلة عند قمر الحوت!

. قمر الحوت جداً غامض، لغز متحرك واستحالة تفهمه هما النهاية، هما رقم ١٢ وانا بشوف ان القمر ده عنده قدرات خارقة ومعاه رخصة للتنقل بين عوالم مختلفة بدون ما حد يلاحظ وده بينعكس في حياتهم بقدرتهم علي الاختفاء، قدرتهم علي تحرير حالهم من اي التزامات وفي اسوأ الظروف "هروبهم" من الواقع.

. لما قمر الحوت يقولك أنا حاسس ان هيحصل كذا بنسبة 95% احساسه هيصدق، الشخص هنا حدسه يخوف وقدرته علي التنبؤ بالمجهول مدهش! يصعب عليه التعبير بالكلام احياناً بس يا الله دايماً احساسه صادق ومفيش اي تفسير علمي لذلك حتي الشخص ذات نفسه مش بيبقي فاهم ازاي عرف او توقع ذلك.

. حساسية قمر الحوت الكبيرة وحدسه العالي بيخوفه و بيخدمه في نفس الوقت. بيخاف لأن اوقات كتير مش بيكون عارف يصدق، مش بيعرف يحدد اذا كان الصوت الداخلي ده حقيقي ولا وهم هو عايش بين عالمين حرفياً ومفيش اي حاجة مضمونة او واضحة ليه. القمر الوحيد اللي تقدر تقول انه عايش "بالاحساس"..

. قمر الحوت عاشق للمجهول، عنده فضول يعرف اسرارك، يعرف انت مخبي ايه وهيعرف والمضحك انه هيعرف لوحده يعني مش هيحاول يسألك زي قمر الجوزاء او يختبرك زي قمر العقرب مثلاً، بمنتهي الهدوء هتلاقيه بيقولك حاجة غريبة جداً عن نفسك او عن حياتك لدرجة انك هتخاف منه او هتقول عليه مجنون.

. قمر الحوت عشوائي جداً وبيعرف يسيب نفسه ويرمي حاله في حضن شغفه واللي بيحبه بدون ما يفكر كتير ومش بيخاف من الضياع ولا بيخاف علي حياته وروتينه او التفاصيل اللي بتشغل دماغ الانسان المعاصر بالعكس هو بيبحث عن العالم بتاعه اللي ممكن يكون شخص، شغل، دراسة، هواية مش هتفرق معاه.

. مشكلة قمر الحوت انه احياناً مش بتفرق معاه وبينسي نفسه، بينسي حدوده، بينسي ان عنده التزامات و مسؤوليات وليه حقوق واحتياجات وده بيدفع الشخص للتعامل بمثالية في احسن الحالات او بسذاجة واهمال في اسوأها فسهل الشخص ينسي نفسه ويتعامل بعشم زيادة ولذلك يصعب عليهم تقبل الواقع.

.  خاصةً رجل قمر الحوت بيكون متعب في علاقاته احياناً لأنه بيفرض "توقعاته" علي اللي بيحبها بدل ما يتقبل الواقع نفسه، فهو متخيل انك تقدري تعملي حاجات يصعب عليكي فعلها ومش قادر يصدق ده. في الحب قمر الحوت احياناً سواء امرأة او رجل اختياراته بتكون عشوائية جداً و غير واقعية.

. قدرة قمر الحوت الكبيرة علي الحب ومرونتهم واستعدادهم للضياع والتضحية في سبيل شئ كبير او شخص اخر بيدفعهم لاختيارات جداً غريبة وغير مفهومة وعشان كده الشخص "غير عملي" و في اسوأ الاوضاع موهوم فسهل تلاقيه بيحب شخص مختلف عنه بمراحل، اقل منه بكتير او مش من بيئته او غير متاح اصلاً.

.  قمر الحوت حياته فوضوية بشكل كبير بس من الفوضي دي بيقدر يخلق نظام ليه. الشخص هنا محمل بتجارب وخبرات سابقة تخليه حكيم زمانه ف ليه يعمل المتوقع او يلتزم بروتين معين! هو بيبحث عن شئ عميق، مجنون، مجهول. افتكر ان قمر حوت مش عايز يضع نهاية، بيكره الحدود هو عايزها دايماً مفتوحة..

.  قمر الحوت مش بيقبل الرفض او كلمة "لأ" بسهولة مش لأنه عنيد بس هتلاحظ ان في صراع قوي بين التوقعات اللي في دماغه وبين الحقائق المعروضة علي ارض الواقع فهتلاقي ان الشخص في حالة "رفض" دائم للواقع بسبب "التصور" اللي في دماغه وده بيدفعهم للابداع علي فكرة ويعتبروا عباقرة في مجالاتهم.

← الجانب العاطفي لقمر الحوت جداً معقد ومثير وهتلاقي قصص متعلقة بالخيانة، الخداع، عدة اطراف ولكن الموضوع مش هيكفي مقال واحد فلو حد مهتم يقولي في التعليقات ونكتب عن قمر الحوت أكتر. في النهاية صعب الكلام ينطبق علي كل شخص قمره في برج الحوت ولذلك خريطتك ليها الكلمة الأخيرة وافتكر دايماً ان مفيش بطل لحكايتك غيرك :) 



ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

إتصالات الزهرة والطالع في خريطة الميلاد.

 




. الزهرة كوكب الجمال، الحلاوة، الطعامة والدلع فطبيعي و منطقي للغاية ان ده ينعكس علي الأشخاص اللي عندها اتصال بين الزهرة والطالع او الاشخاص اللي زهرتها بتحكم الطالع زي طالع: الثور او الميزان الاشخاص دي تقديرها لمظهرها جداً عالي ومش بس علي صعيد الشكل ولكن السلوك، التصرفات.

. الانسان بطبعه بينجذب لكل ما هو جميل، لكل شئ بيحسسه بنوع من المتعة والاشباع وبالتالي الناس دايماً بتنجذب للأشخاص دي لأن عندهم قدرة علي اشباع رغباتك او عشان اكون ادق "مراوغتك" بشياكة. لأن اتصالات الزهرة والطالع بتخلق شخص حاد وجاد للغاية بس استحالة تحس او تشوف ده ظاهرياً.

. ولذلك الاشخاص اللي عندها اتصال بين زهرتها وطالعها عندها معايير جداً عالية فيما يخص العلاقات وده لأن تقديرهم لنفسهم عالي والمثير هنا ان في اعتقاد شائع ان الاكثر جمالاً هما الاقل حظاً او عندهم قابلية لمواجهة تحديات اكبر في حياتهم العاطفية وده نسبياً صح بسبب معاييرهم العالية.

. من الامور المثيرة للاهتمام ان عادةً اتصالات الزهرة والطالع بتضع الشخص في تجارب من خلالها بيتم تقييم جماله، فأغلبهم بيبقي تحت ضغط انه لازم يظهر بشكل معين وبعض الاشخاص دي وخاصةً في صغرها ممكن يتم التقليل من جمالها او انتقادها علي مظهرها ودايماً الناس عايزة تقيمهم او تقارنهم بحد.

. ومن هنا بنعرف ليه بعض الاشخاص دي خاصةً اللي عندهم اقتران وتربيع بيقعوا في فخ الاهتمام المبالغ بالمظاهر والماديات وبيصعب عليهم التعبير عن غضبهم او كرههم لبعض الامور وبيضغطوا علي نفسهم بشكل كبير لتجنب أي انتقاد خارجي وده بسبب طبيعة الزهرة السلبية اللي بتميل لتجميل الأمور.

. واللي بيحصل ان الاشخاص دي اغلب الوقت بتبقي تحت ضغط انها تظهر في اجمل وافضل وضع مقابل انها تكبت غضبها او مشاعرها الحقيقية، فالشخص يحسسك بانسجام وتوافق كبير ولكن من جواه ممكن يكون حرفياً عايز يفتح دماغك وعشان كده بيحبوا علاقاتهم تكون سطحية لأن يصعب عليهم كبت غضبهم لوقت كبير.

. ولذلك بيتم اتهام الاشخاص دي احياناً بأنهم متصنعين "fake" وخاصةً من النساء لأن عادةً الستات اللي عندها اتصالات مماثلة في خريطتها بتواجه غيرة من نساء اخري او دايماً الستات بتحاول تقلدهم او تقربلهم من اجل معرفة اسرارهم والاستفادة منهم وهكذا. ولكن طبعاً ده في اسوأ انعكاس للطاقة.

. في الحقيقة الاشخاص دي مش "متصنعة" بهدف التصنع قد ما بتكون بهدف حماية نفسها بجانب ان الزهرة كوكب مسالم وراقي فبالنسبة للاشخاص دي انه يقولك مجاملة او يعمل نفسه موافق علي كلامك مش مشكلة كبيرة بالعكس هيريح دماغه من افلام هندي كتير سهل تعكره لأن الزهرة عكس المريخ مش عايزة مشاكل.

. وبالتالي الاشخاص اللي عندها اتصالات بين الزهرة والطالع او طالع ميزان أو ثور جداً مسالمة وراقية وبتعرف تتكلم وتلبس وتضحك وتجامل وبيعرفوا يظهروا جمالهم بمنتهي البساطة والانوثة، وهتسمع منهم اللي عايز تسمعه دي لعبتهم! ولكن ده مش بيقلل من قوتهم فلو حاولت تتخطي حدودك هيظهر الوحش.

. فسهل يتم تقييم الاشخاص دي غلط احياناً او الناس تبقي واخدة عنهم فكرة انهم مغرورين او انهم مش هيرضوا بأي حد بسبب جمالهم او وضعهم ولذلك في تجاربهم العاطفية المبكرة سهل البعض منهم يجذب اشخاص سطحية او غير جادة او يحتاجوا وقت طويل قبل ما يستقروا في علاقة تناسبهم.

← كالعادة عندي كلام كتير بس مش حابة نطول الموضوع عن كده. في الموضوع ده حبيت نركز علي جوانب اعمق لأتصالات الزهرة والطالع ومش علي النقط السطحية المتعلقة بجمالهم لأنهم اعمق من كده بكتير. صعب الموضوع ينطبق علي الجميع لأنها متوقفة علي طبيعة كل خريطة فحاول تكون مرن مع الثريد عزيزي القارئ وافتكر دايمًا إن مفيش بطل لحكايتك غيرك. 




ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

إتصالات الزهرة و زحل في خريطة الميلاد.

 





← في الموضوع ده هنتكلم عن أثر اتصالات الزهرة وزحل في خريطة الميلاد وبالتالي الثريد دي ليك لو عندك (اقتران/معاكسة/تربيع/تثليث/تسديس) بين الزهرة وزحل في خريطتك. مهم تكيف الكلام بطريقة تناسبك عزيزي القارئ لأن في نهاية طبيعة الاتصال والأبراج والبيوت اللي بيقع فيها هتعمل فرق كبير.

. أول حاجة سهل تلاحظها علي الشخص اللي عنده اي اتصال بين الزهرة وزحل هتكون جديته في عرض نفسه حتي لو الشخص تافه او بسيط او غير جاد للغاية وجود اتصال مماثل هيخليه علي الاقل عايز يظهر للناس في نموذج "الشخص المحترف" واغلب الأشخاص دي بيليق عليها الستايل الفورمال اللي بيوحي بالجدية.

. الزهرة بتلعب دور اساسي في قدرتك علي الجذب ولذلك لما يكون عندك اي اتصال بين الزهرة وزحل حاول دايماً تتعامل مع مظهرك بجدية وتلبس الوان، ستايل بيوحي بالقوة، العملية يعني لما تظهر نقول "الكبير وصل" لأن ممكن تتعرض للانتقاد او جاذبيتك تقل لو كنت عشوائي في اختياراتك او مبالغ.

. اي اتصال بين الزهرة وزحل بيمنح الشخص "ثقل" في إظهار إعجابه او في التعبير عن مشاعره يعني مش ده الشخص اللي هينجذب لأي حاجة زي المجنون من اول مرة بالعكس عادةً الشخص بيحب ياخد وقته وحتي لو هو داخلياً متحمس ومتأكد من مشاعره هيختار انه يتقل ويسيطر علي نفسه لحد ما يتأكد الأول.

. في حالة الاقتران والتربيع بتجد ان زحل بيضع حاله "مدرب" علي الزهرة فطول الوقت بيضغط عليها ويقولها اشتغلي، حاولي، استمري ولذلك بتجد ان الشخص بيتعامل مع جانب العلاقات او الصداقات والشراكات بجدية رهيبة وهدفه دايماً انه يكون في شئ مستقر ومستمر.

. ولذلك الشخص اللي عنده اي اتصال بين الزهرة وزحل ملتزم للغاية وهتجد انه دايماً بيبذل مجهود في علاقاته وبيحاول بأستمرار واستحالة يغلط او يكسل بالعكس لدرجة ان جديته احياناً بتخرب علاقاته وعشان كده البعض منهم علاقاتهم بتفتقد عنصر المتعة والبهجة بسرعة وبتتحول (لعقد عمل) او التزام.

. في اتصالات الزهرة وزحل بتشوف ان الشخص مش بيتقبل السلوك اللعبي او المتهور من الآخرين بسهولة خاصةً اللي عندهم اقتران ولو هو معجب بيك هيحاول دايماً يهذب من طاقتك او يخليك اكثر جدية ولذلك هما بمثابة ارض صلبة في العلاقات تقدر تقف عليها وانت مغمض عيونك.

. من ضمن التحديات اللي بتواجه اتصالات الزهرة وزحل وخاصةً اللي عندهم معاكسة ان الشخص احياناً بيجذب اشخاص يصعب معاشرتها والتعامل معاها، اشخاص طباعها صعبة في المطلق او في فرق سني كبير بينه وبينهم وده بيخلق احياناً نوع من البرود او الجفاف في علاقاتهم و تحديداً بعد فترة.

. بعض النساء اللي عندها اتصال بين الزهرة وزحل خاصةً (الاقتران، التربيع، المعاكسة) بتجذب نماذج ذكور ناجحة جداً اجتماعياً او مادياً بس متعبين جداً علي الصعيد الشخصي او فيهم برود، بخل، غيرة، سيطرة وبتجد ان بعضهم بيستمر لفترة قبل ما ينهي العلاقة لأنهم مصممين يحاولوا لآخر نفس.

.  الوضع بيختلف في خريطة الرجل اللي عنده اتصال بين زحل والزهرة لأنه بينجذب للست الناجحة والملتزمة اللي كلامها قليل وتقدر تتحط تحت أي ضغط ولذلك اختياراتهم عملية وذكية بس في نفس الوقت قد يتم اتهام بعض الذكور دي بالبخل او البرود او القسوة خاصةً أصحاب (التربيع، الاقتران، المعاكسة)

. من ضمن النقط المثيرة ان اتصالات الزهرة وزحل في خريطة الرجل قد تضعه في أزمات مادية بسبب علاقاته، زي الزواج من امرأة مادية او انه يتعرض لخسائر مادية بسبب زواج، شراكة أو طلاق ومن أشهر الحالات: حالة جوني ديب وآمبر هيرد اللي عنده تربيع بين الزهرة وزحل وچيف بيزوس وطليقته اللي عنده الاقتران وتقدروا تعملوا بحث عن الحالتين لو مهتمين. 

. اتصالات الزهرة وزحل سواء في خريطة رجل أو امرأة بتضعهم في القمة خاصةً علي الصعيد الاجتماعي والمادي بالرغم من مرورهم بتحديات متعددة بس الأشخاص دي مع الوقت بتجد المكان اللي يناسبها بجانب ان الشخص هنا نفسه طويل يعني مش هيمل بسرعة ويشتت حاله بالعكس هيتألق في أكثر الأوقات صعوبة.

.  بالنسبة لأصحاب التثليث والتسديس بين زحل والزهرة فحدة الطاقة بتكون اقل وبالتالي بتجد الشخص هنا عارف بشكل فطري امتي يتعامل بجدية وامتي يبقي مرن ويعديها. عادةً الأشخاص دي مش من النوع اللي توقعاتها عالية بالعكس بيحبوا يعملوا اللي عليهم ويكونوا مع أشخاص في المقابل زيهم بدون مبالغة.

← طبعًا أحنا اتكلمنا في إطار شمولي فصعب الكلام ينطبق علي الجميع لأن خريطتك مش مجرد اتصال بين الزهرة وزحل فقط. ضع في اعتبارك ان أصحاب (التثليث والتسديس) هينطبق عليهم الكلام بنسبة اقل من أصحاب (الاقتران، التربيع، المعاكسة) واتمني ان الموضوع يلهمك ويدفعك للبحث اكتر وافتكر دايماً إن مفيش بطل لحكايتك غيرك عزيزي القارئ. 💫 وسط كل الزحمة والخيارات المتعددة افتكر دايماً انت مين، افتكر انت بتحب ايه، افتكر احلام الطفولة ورغبات المراهقة المجنونة، افتكر لعبك المفضلة والمزيكا والأفلام والروايات اللي سمعتها وشوفتها وقريتها مليون مرة. في عالم ملئ بالخيارات اختار نفسك واللي بتحبه. ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜
https://twitter.com/Chiron_Cono

البيت الثامن في الخريطة التوافقية.

← قبل كده عملنا كذا ثريد في تويتر عن البيت ١٢ في الخريطة التوافقية وأثر الكواكب المختلفة في البيت ١٢ والمرة دي هننتقل للبيت ٨ لأنه من البيوت الدسمة جداً في الخريطة التوافقية وهنقسم كلامنا علي كذا موضوع كالعادة. علماً أن طبيعة المواضيع دي بتكون طويلة شوية عزيزي القارئ فابدأ فيها وانت رايق.

. البيت ٨ مثير للجدل لانه في الأصل بيت العقرب واي حاجة مرتبطة ببرج العقرب، البيت ٨ او بلوتو دايماً بتثير فضول الجميع ويمكن البيت ٨ في الخريطة التوافقية واخد الضجة دي بسبب انه مرتبط بالجنس واحنا بنموت في قلة الأدب ولكن بعيداً عن الهزار البيت ٨ من البيوت اللي هتبهرك لو تعمقت فيها.

. ببساطة الموضوع ده ينطبق علي الأشخاص اللي عندها كوكب او أكثر بيقع في البيت ٨ في خريطة ميلاد الشخص الاخر او العكس لو في شخص عنده كوكب او اكثر بيقع في البيت ٨ في خريطة ميلادك. وفي الموضوع ده هنتكلم عن طبيعة هذه العلاقات بشكل عام وفي موضوع لاحق هنشرح أثر الكواكب بالتفصيل.

. لما بنشوف البيت ٨ في الخريطة التوافقية مزدحم سواء كواكبك في البيت ٨ للطرف الاخر او العكس بنعرف ان العلاقة دي هتشهد تقلبات قوية لأن البيت ٨ عكس البيت ٢ فنمط العلاقة دي صعب يكون مستقر. فهتجد اغلب الوقت ان علاقة الشخصين ببعض هتجلب لكل واحد فيهم تغيرات قوية او هتجبرهم علي التغيير.

. علاقات البيت ٨ بتبدأ في اوقات انتقالية او مهمة احياناً زي لما تتعرف علي شخص في مرحلة انت فيها لسه سايب عملك او وضعك المادي غير مستقر او لسه خارج من انفصال/طلاق او حد من أسرتك مريض يعني ممكن العلاقات دي تبدأ بنمط مماثل او تتعرف علي الشخص ومن بعده تبدأ موجة من الأحداث القوية.

. و مش كل الأشخاص اللي كواكبك في بيتها ٨ او العكس هتتعرف عليها في اوقات صعبة بس هتمر بمحطات قوية خلال علاقتك بيهم. زي مثلاً لما تتزوج وبعدها بفترة قصيرة حد من الاسرة يموت او تحصل علي ترقية كبيرة وبوووم وضعك المادي يتغير بشكل ملحوظ. فاغلب الوقت العلاقة هترتبط بلحظات فارقة في حياتك.

. بالإضافة الي ذلك اوقات طبيعة العلاقة اللي بتكون بينك وبين الشخص اللي كواكبه في بيتك ٨ او العكس شوية مريبة او مثيرة للجدل اجتماعياً فممكن العلاقات دي يكون فيها فرق عمري كبير، الست اكبر من الرجل بفرق، علاقة ثلاثية، طرف فيهم متزوج أو حتي الطرفين ده لو الخريطة دراما قوي في نفسها.

. وبعيداً عن الاحتمالات المختلفة اللي ممكن نلاحظها الا ان كل الاحتمالات دي هتتوقف علي طبيعة الخريطة فصعب الكلام ده ينطبق علي الجميع ولكن مع تعدد الاحتمالات والقصص في شئ مشترك في النماذج دي كلها وهو: الانجذاب القوي والغير مريح احياناً. عارف لما يعجبك حد بشكل مش مريحك؛ حاجة زي كده.

. وجود كواكب شخص آخر في بيتك ٨ او العكس هتخلق رابط روحي قوي بس مش زي بتاع البيت ١٢ الخيالي لأن في البيت ٨ الوضع مختلف فهنبقي قدام شخصين عارفين نقط ضعف بعض، عارفين أسرار بعض، عارفين رغبات بعض بدون مصارحة مباشرة ده بجانب ان سهل يجمعوا اخبار/معلومات عن بعض بطرق مدهشة.

. وعشان كده بنقول ان في أسوأ استخدام للطاقة سهل علاقات البيت ٨ تبقي toxic او سامة لأنك هتجد احياناً طرف فيهم او الطرفين علي حسب وضع الخريطة متمسكين ببعض وبالعلاقة بشكل غير صحي لدرجة ان ممكن يبتزوا، يقيدوا ويراوغوا بعض بأساليب لا يمكن تصورها عشان بس مش متقبلين فكرة إنهاء العلاقة.

. في نفس الوقت عزيزي القارئ العلاقات دي بتحمل جانب نفسي قوي لأن زي ما قولنا الأشخاص دي اوقات بتتعرف علي بعض في مراحل صعبة/معقدة في حياتها فطرف فيهم بيكون بمثابة طوق نجاة للشخص الاخر وده امر طبيعي لأنك استحالة تنسي الشخص اللي كان موجود في ازمتك او في اهم مراحل حياتك، للأبد مميز.

. في اوقات تانية الأشخاص دي بتمر بتجارب في العلاقة بتجبرهم علي الاستمرار حتي لو الوضع غير صحي لأن احياناً بيقيدوا ببعض خاصةً لو بنتكلم عن طرفين متزوجين، ممكن طرف فيهم يكون معتمد مادياً علي التاني وبالتالي قرار الانفصال صعب او معقد فلازم يكمل.

. علي صعيد اخر في جوانب إيجابية رهيبة لوجود كواكب شخص في بيتك ٨ او العكس، اولها ان زي ما في مواقف ممكن تدمر العلاقة وتخليها سامة كمان في مواقف بتحصل بتقوي الرابط بين الطرفين بشكل مذهل! وده المثير للاهتمام ان ممكن كل الظروف تتوقع ان الثنائي ده مستحيل يكمل ومع ذلك يكسروا الدنيا.

.  الشخص اللي كواكبه بتقع في بيتك ٨ او العكس عنده قدرة كبيرة علي اسعادك مفيش شخص هيعرف يلبي احتياجاتك ورغباتك علي جميع الاصعدة زي الشخص ده، من نظرة واحدة هيفهمك وهيوصلك شعور استحالة تنساه فده حقيقي الشخص اللي صعب تضعه في مقارنة مهما كان "وغد" وده طبعاً في أفضل استخدام للطاقة.

. لأن في أسوأ استخدام للطاقة سهل الشخص اللي كواكبه بتقع في بيتك ٨ او العكس يثير غضبك وغيرتك بشكل يخليك تفقد أعصابك وده معناه ان الشخص يا هيعمل حاجات يهوسك بيه يا هيعمل حاجات تكرهك في اليوم اللي قابلته فيه وعلي حسب وضع الخريطة التوافقية و خريطة ميلاده والكوكب اللي بنتكلم عنه.

. كالعادة دي نبذة عامة عن علاقات البيت ٨ في الخريطة التوافقية يعني شخص كواكبه بتقع في بيتك ٨ او العكس طبعاً في تفاصيل كتيرة جداً في الموضوع بس هتتوقف علي طبيعة الكوكب اللي بنتكلم عنه والاتصالات اللي عاملها وهل بتدعم العلاقة ولا العكس لأن وجود الشمس غير القمر غير الزهرة ،والخ..

← يهمني تعرف عزيزي القارئ ان الموضوع ده مش هينطبق علي الجميع او علي حالتك لأننا لسه بنتكلم بشكل عام وفي الموضوع القادم هنبدأ نميز بين أثر الكواكب والنقط المختلفة في البيت ٨. ف كالعادة خريطتك ليها الكلمة الأخيرة ومفيش بطل لحكايتك غيرك. 

ملحوظة صغيرة: الصورة اللي استخدمتها من فيلم vicky cristina barcelona وفي اعتقادي الفيلم ده نموذج مثالي لطبيعة علاقات البيت ٨ فلو حد مهتم يتفرج عليه ينطلق ويركز علي العلاقة اللي بين Penelope Cruz و Javier Bardem لأنها هتوصله الفكرة بشكل رائع وطبعاً ده متعلق بهوسي بالسينما والفلك :) 





شمس التبريزي بيقول: "نحتاج بين فترة واخري الي ان نختفي تماماً ولا يتمكن احد من العثور علينا"

اوقات كتير بتبقي عايز تختفي من الدنيا، من ضوء الشمس ورومانسية القمر وفطارك اليومي المفضل وساعتها شعورك باللاشئ بيتحول لكل شئ. انت مش عايز تكون وحيد ولكن محتاج شوية وقت لوحدك.





ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

اقتران الشمس والزهرة في خريطة الميلاد.

 

مبدئياً الموضوع  ده  نظرة علي التحديات اللي بتواجه الشمس والزهرة موجهة للأشخاص اللي عندها اقتران بين الشمس والزهرة في خريطة الميلاد بالتحديد ولكن بعض الأجزاء قد تنطبق أيضاً علي أصحاب شمس الثور و الميزان او شمس البيت الثاني والسابع. فلو عندك مكان مماثل تابع الموضوع  لو تحب.

. للي مايعرفش انا بحب اعمل حاجتين:
١. اختفي
٢. اتهوس بكوكب مختلف كل فترة
وموخراً اقدر اقول اني أصبحت مهووسة بالزهرة وده مشجعني اني اتكلم عنها في موضوعات اكتر لأن من فترة عملت ثريد مرتبط باتصالات الزهرة وزحل وثريد اخر مرتبط باتصالات الزهرة والطالع في تويتر وفي الموضوع ده دور الزهرة والشمس.

. الزهرة من الكواكب المرتبطة بالرفاهية، الراحة، الاستقرار المادي، المساواة، مبادئك كشخص ورغباتك وده مرتبط بطاقة برج الثور والميزان بس لما تيجي تمزج ده مع كوكب زي الشمس هتجد ان الشخص هنا هدفه الأساسي إيجاد طرق/وسائل/علاقات/اشخاص تساعده علي ان حياته تبقي "أجمل"

. يقال ان صراعات الإنسان بتبدأ اول ما يبدأ يحس انه "عايز حاجة" او انه لازم يبقي عنده حاجة ومن هنا بتبدأ قصة اقتران الشمس والزهرة لأن الشخص هنا عادةً "عايز" حاجات كتير، توقعاته عالية وتقدر تقول عنده تصور او رؤية للوضع اللي المفروض الأمور/الأشخاص والاحداث تكون عليه.

. وخلينا نرجع لطفولة او لتجارب الأشخاص دي لأنها بتلعب دور كبير خاصةً لو الشخص نشأ في محيط ظروفه المادية كانت سيئة او متقلبة او واجه أزمات مادية كبيرة في حياته ده هيأثر علي ثقته في نفسه وقدرته علي العطاء وطرق اشباعه لرغباته بشكل كبير وبالتالي الاستقرار المادي والعاطفي مهم ليهم.

.  بعض الأشخاص دي ممكن تعاني في مراحل بسبب استبداد الآخرين او استهتارهم او انانيتهم، فده الشخص اللي ممكن يكون اتعامل مع اب كان بيتزوج بأستمرار وغير متاح او غير مسوؤل أو أب بيضع مصالحه واشباع رغباته أولوية والباقي مجبر يطيع او اب أهم حاجة عنده الفلوس فدايماً بيشتغل او مسافر.

. وطبعاً مش كل شخص عنده اقتران بين الشمس والزهرة هيبقي عنده اب مماثل ولكن هتجد ان اغلبهم تعب وواجه تحدي بسبب تصرفات أنانية او غير حكمية من اشخاص كانت مسؤولة عنه بشكلاً ما وده اللي بيقوي من طموحهم المادي لأنهم عايزين يهربوا من العك ده كله ويعيشوا بالطريقة اللي يستحقوها.

.  وهنا بقي الفخ لأن الاتصال ده بيخلق نموذجين من البشر:

١. حبيب الجماهير

أو

٢. الديكتاتور اللي مستعد يستبد الجماهير

هتبقي اي نموذج منهم؟ صعب اقول بس انت الوحيد اللي تقدر تحدد لأن سهل عليك تكون النموذجين فكله متوقف علي اختيارك.

. لو عندك اقتران بين الشمس والزهرة لازم تنتبه لتصرفاتك وخاصةً في الحب والصداقات والعلاقات لأن اوقات بيبقي في نزعة سيطرة منعكسة منكم فبتجد حالك بتتعامل مع أي حاجة بتحبها علي اساس انها بتاعتك، ملكيتك وده بيخليك في اوقات مش قادر تشوف الشخص الاخر بحيادية، رافض تمنحه مساحة، وقت والخ

.  ولذلك اقتران الشمس والزهرة هتخليك شريك صعب في اوقات وخاصةً الذكور اللي عندها الاتصال ده وهتجد ان اغلبهم بيعمل حركات كبيرة ويبذل مجهود ضخم ويتخذ قرارات جنونية بس في نفس الوقت لما بيفشل في الحصول علي المقابل المتوقع بيبدأ يفقد اعصابه ومبادئه ويتحول لوحش قلبه مكسور.

. الشمس والزهرة بتخلق شخص بسهولة ممكن قلبه يتكسر، لأن الأشخاص دي فعلاً بتعطي من قلبها لأنها حريصة انها توفر اعلي جودة واحسن تجربة للي حواليها تخيل طاقة الأسد الثور الميزان مع بعض فهدفهم حقيقي توفير الراحة والسعادة بس من "منظورهم" وهي دي المشكلة عادةً.

. وبالتالي لو انت بتتعامل مع شخص عنده اقتران بين الشمس والزهرة مش ناضج او مستغل الطاقة بشكل سلبي قد يكون من النوع المتسلط او اللي بيحاول "يشتري" حبك او اللي بيستخدم "نفوذه" عشان يضغط عليك وتخصع لرغباته ولو انت عندك الاتصال ده لا تغذي الطاقات دي فيك لو حسيت ان ده ينطبق عليك.

. بالمناسبة صاحب المقولة الشهيرة: الغاية تبرر الوسيلة هو الفيلسوف الإيطالي niccolo machiavelli اللي بالمناسبة شمسه في برج الثور.

. من وجهة نظري اقتران الشمس والزهرة بيكون أصعب في خريطة الرجل او سهل يخلق منه نموذج "شرير" بسهولة لو استغل الطاقة غلط وفي خريطة النساء تأثيره بيظهر اكتر في علاقاتها وحياتها العاطفية ولذلك سهل البعض منهم يحس انه مش لاقي الشخص المناسب او ان مفيش شخص مناسب أو يرتقي لمعاييرهم.

. من اشهر الأمثلة اللي ممكن نذكرها هنا "هتلر" اللي عنده الشمس والزهرة في برج الثور المحكوم بالفعل من الزهرة فيعتبر مثال نموذجي. الشخص ده بدأ الحرب العالمية الثانية ودي نقطة مثيرة لأن الشمس والزهرة ممكن تخلق شخص مههوس بفكرة المكسب/الربح لدرجة التخريب او التدمير او الحروب.

. فلو عندك اقتران بين الكوكبين ومفيش استغلال  جيد للطاقة سهل رغباتك الشخصية تدفعك لتدمير نفسك وتدمير الآخرين وعلي فكرة هتلاحظ احياناً ان بعض القادة، الرؤساء والنماذج الديكتاتورية عندهم اقتران بين الشمس والزهرة او الشمس في برج الثور وتحديداً الذكور مش بنتكلم هنا عن النساء.

.  قبل ما انهي الثريد عايزة ارجع للنساء اللي عندها اقتران بين الشمس والزهرة لأن الستات دي بتنخدع اوقات او بتبني للرجل او الشخص اللي بتحبه مملكة وتقوله انت الملك لحد ما تكتشف ان حبها كان عامي عيونها مش اكتر واللي عايزة اقوله لست الشمس والزهرة انها تهتم بتوازن العلاقات اللي بتدخلها، تحافظ علي حياديتها لأن مشاعرها ورغباتها سهل توصلها لطريق مسدود او يخلق عندها اعتقاد ان حبها يقدر يغير اي حد حتي لو ده مش حقيقي. 

. كالعادة خريطتك ليها الكلمة الأخيرة ومفيش بطل لحكايتك غيرك. الموضوع ده صعب ينطبق علي كل الأشخاص اللي عندها اقتران بين الشمس والزهرة او شمس الثور او الميزان لأن في النهاية كل خريطة ليها تركيبتها ولكن حبيت اتعمق شوية في الشمس والزهرة واتمني تكون استمتعت عزيزي القارئ بجد. 


وافتكر دايمًا: صعوبة او سهولة ظروفك مش بتمنعك من الاختيار، في كل لحظة تقدر تقف وتاخد القرار المناسب. اعتقد في النهاية اللي بيفرق بجد انك تكون متأكد من جواك انك اخدت القرار الصح. الأفضل من الشعور بالندم هو التخلص منه. تأكد أن عندك وقت مهما حسيت انك متأخر..

ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono

العقدة الشمالية في برج الثور والعقدة الجنوبية في برج العقرب.

 كما هو فوق كذلك هو تحت 
كما في السماء كذلك علي الأرض 

. من يوم 18 يناير 2022 عقد القمر (العقدة الشمالية + العقدة الجنوبية) هينتقلوا من محور الجوزاء والقوس لمحور الثور والعقرب ولو مش عارف عزيزي القارئ دايمًا العقدة الشمالية بتكون معاكسة للعقدة الجنوبية وبناءً عليه مع وجود العقدة الشمالية في برج الثور؛ العقدة الجنوبية هتكون في برج العقرب ويستمر العبور لحد 23 يوليو 2023 ان شاء الله. 

. من وجهة نظري من أهم المحطات في 2022 هو انتقال عقد القمر من محور الجوزاء/القوس لمحور الثور/العقرب لأننا هنشوف عقد القمر في الثور/العقرب هيلعبوا مع زحل العبور في الدلو واورانوس العبور في الثور ودي حاجة بالتأكيد مثيرة للأهتمام وفي اعتقادي الطاقة دي هتصل لذروتها خلال شهر أبريل؛ يوليو واغسطس من عام 2022 لأن هيحصل اتصالين في غاية الأهمية خلال التوقيت ده:
. يوم 11 ابريل: تربيع زحل العبور في برج الدلو لعقد القمر في محور الثور/العقرب
. يوم 31 يوليو: اقتران اورانوس العبور في برج الثور للعقدة الشمالية في برج الثور 
وبالتالي سهل نلمس اثر الطاقة دي بقوة خلال هذه المراحل.

. ببساطة العقدة الشمالية بتمثل = تجربة جديدة و العقدة الجنوبية بتمثل = تجربة قديمة 
مفيش حاجة اسمها العقدة الشمالية أهم من العقدة الجنوبية ⤩
مفيش حاجة اسمها لازم تتجاهل انشطة البرج والبيت اللي بتقع في عقدتك الجنوبية⤩
مفيش حاجة اسمها ان العقدة الشمالية أثرها إيجابي بينما العقدة الجنوبية أثرها سلبي⤩
كل الكلام ده بطيخي وغير منطقي بالمرة لأن الجديد مبني علي القديم أنت مش هتتخرج من الجامعة لو مادخلتش المدرسة وبناءً عليه العقدة الشمالية والجنوبية بيكملوا بعض وعشان كده بدأت كلامي بقانون هرمسي شهير: كما هو فوق كذلك هو تحت وكما هو في السماء كذلك علي الأرض وفي الكون بالذات كل حاجة مرتبطة ببعضها وكل حاجة بتكمل بعضها واستحالة تجد شئ شاذ بشكل مطلق وكل ما تمعقنا في الكون والطبيعة مش هنلاقي حاجة نقولها غير سبحان الله ولكن طبعًا الكون مش موضوعنا دلوقتي بس عطاردي الجوزائي يتعب لو مادخلش كل المواضيع في بعضها كالعادة.

. نطلع بقي من الرغي ده كله بإن العقدة الشمالية تجربة جديدة عليك؛ حاجة لسه هتجربها؛ حاجة لسه هتكتشفها؛ حاجة لسه أول مرة هتعملها وبمجرد ما تعملها خلاص هتعتاد عليها وهتتحول من عقدة شمالية لعقدة جنوبية من تجربة جديدة؛ لتجربة قديمة؛من وضع غير معتاد عليه لوضع اتعودت عليه ولذلك علي عكس المشاع العقدة الجنوبية بتمثل نقط قوتك؛ اللي بتعرف تعمله واللي جربته اكتر من مرة لدرجة انه بقي جزء منك وبيمثلك ولذلك ممكن نقول إن أول يوم في أي حاجة جديدة تعملها بيمثل طاقة العقدة الشمالية زي أول يوم مدرسة؛ أول يوم في أول وظيفة ليك أول تجربة عاطفية ليك أو أول تجربة أمومة أو سفر أو استقلال والحياة مليئة بالمرات الأولي كلنا لينا (أول مرة) في الحياة وأول تجربة دايمًا ليها سحرها الخاص؛ ليها قلقها وخوفها وكمان حماسها. أنا عن نفسي صعب انسي أول مرة عملت فيها interview لفرصة كنت هموت عليها كان وقتها عندي 19 سنة تقريبًا وكنت مرعوبة بس كمان متحمسة وقعدت افكر هلبس ايه وهجاوب ازاي حتي الطريقة اللي هقول بيها اسمي فكرت فيها وده بيمثل طاقة العقدة الشمالية التجربة الجديدة المجهولة اللي انت في قمة حماسك ليها بس كمان في قمة خوفك لأنك حرفيًا مش عارف اي حاجة ومش عايز تعك الدنيا في نفس الوقت.

. ومن بعد ما اتكلمنا عن معاني العقد في ابسط اطاراحب نوجه تركيزنا علي اثر وجود العقدة الشمالية في برج الثور والعقدة الجنوبية في برج العقرب خلال 2022/2023 إن شاء الله ولازم نعرف ان العبور ده ليه أثرين: أثر شخصي يعني أثره عليك أنت شخصيًا وده هيعتمد علي وضع خريطتك والبيوت اللي بيقع فيها العبور والاتصالات وكل الالخ اللي انتم عارفينه. وأثر جماعي أو عمومي وده بيكون مرتبط أكتر بالأحداث والتغيرات اللي ممكن نشهد اثارها خلال السنة سواء علي الصعيد الفكري؛ السياسي؛ الاقتصادي؛ الابداعي يعني أثر عمومي ومش مرتبط بشخصك ولذلك ممكن يكون العالم في حالة انهيار بس أنت عايش حياتك عادي فمهم نميز بين الأمرين لأن الأثر الجماعي للطاقة بيختلف عن الأثر الشخصي وده حتي بيفكرني بكلامي مع فوفي صاحبتي ايام الكورونا والعزل والتباعد لما كانت تقولي العالم كله منهار وغضبان وأنا في قمة سعادتي ومستمتعة بالطاقة جدًا ونفهم من ده ان مش بالضرورة الأوضاع/الأحداث السلبية تؤثرعليك في إطار سلبي بالعكس دايمًا المسألة هتختلف من شخص للتاني ومن وقت للتاني لأن ممكن في أوقات تتأثر وفي أوقات تانية يحصل العكس. 

← لو هنبدأ بالأثر الشمولي أو العمومي لعبور مماثل فلازم نتوقع:

. تغيرات كبيرة وغير مستقرة في أسعار السلع/المنتجات الغذائية/ البترول/الذهب/الموارد الأساسية وده سهل يرتب حالة من الهلع والغضب لأن حرفيًا العقدة الشمالية في الثور مع اورانوس فسهل نجد تغيرات غير متوقعة؛ تغيرات سريعة؛ وكمان تغيرات متقلبة يعني فجأة السلع تغلي/تزيد وبعدها بشوية تقل وترجع لقيمتها تاني وهكذا. 

. تقليل الحصص الغذائية/السيطرة علي بعض الموارد/ ازمة انتاجية او نقص في بعض الموارد. فسهل نجد بعض الحكومات بتناقش قضايا مماثلة وبتبحث عن تطبيق لقوانين جديدة. وممكن نقول إن هيبقي في تركيز كبير علي السلع الغذائية والموارد الأساسية في المرحلة دي. 

. سهل نجد تطورات وفرص ضخمة في عالم الفنون والموضة خاصًة ان مشتري العبور ونبتون في برج الحوت هيعملوا تسديس رائع مع العقدة الشمالية في الثور وتثليث قوي مع العقدة الجنوبية في العقرب ولذلك دي مرحلة إيجابية جدًا للمصممين؛ المبدعين؛ الفنانين؛ الرسامين؛ الشعراء؛ المؤلفين؛ صانعي المحتوي بشكل عام ويمكن دي أكتر حاجة أنا متحمسة ليها لأن حرفيًا هنشوف ابداع ليس له حدود في هذه الجوانب خلال الوقت ده وسهل تتشهر وتبدأ اسماء تجارية و brands جديدة في المرحلة دي تتخلق وتتعرف وفي المطلق الحاجات اللي هتتم صناعتها/تصميمها/انتاجها في الوقت ده سهل تحقق نجاح ضخم وتتشهر بشكل كبير لأن الثور معروف (بالجودة العالية) ولذلك اللي فيكم حابب يبدأ brand خاص بيه وعنده أفكار ينطلق.

. طاقة الثور مرتبطة بالاستثمار بشكل كبير ولذلك قد يتم استثمار مبالغ ضخمة في مشروع مستقبلي ويتم الترويج لذلك خلال السنة من مستثمرين ورجال أعمال معروفة وفي اعتقادي الاستثمار والتوسع ده هيكون ليه علاقة بالفضاء والتوسع في المشاريع الفضائية لأن اورانوس في المزيج كما ذكرت من قبل؛ والثور بيرمز للتربة (الأرض) فسهل يتم الترويج للاستثمار والتوسع في اراضي بعيدة؛ جديدة أو حتي فضائية وبصراحة أنا عندي استنتاج شخصي في النقطة دي لأن ممكن يتباع لنا الوهم حرفيًا خلال السنة دي بالتحديد بسبب وجود مشتري ونبتون خريطة العبور في برج الحوت ولذلك استنتاجي ان هيتم الترويج لمشروع ضخم بغض النظرعن طبيعته بشكل شيك وحالم ك (حلم مثالي) وده بيمثل مزيج المشتري+ نبتون مع بعض لحد ما تقتنع وتشتري او تستثمر وده بيمثل طاقة (الثور) بالتأكيد وايًا كان اللي هيتم الترويج ليه خلال السنة هيفشل بقوة ويحقق نتائج عكسية علي المدي الطويل وده لأن زحل العبور في الدلو عامل تربيع مع عقد القمر وعشان كده برضه السنة دي فيها تحمل كثير من الفخوخ لأن العقدة الجنوبية في برج العقرب ففي درجة من الدهاء والمراوغة والتكتم علي الدوافع الحقيقية بس كمان العقرب برج كارمي فلما بتستغل طاقته بشكل سلبي ومنخفض بتكون نتائجه عكسية. ولو تتذكر عزيزي القارئ انا قولتلك في البداية ان العقدة الجنوبية بتمثل نقطة قوة تقدر تعتمد عليها للوصول لأهدافك وعشان كده هيبقي في سهولة كبيرة في اخفاء الحقيقة؛ كشف معلومات محدودة؛ واتباع اساليب مراوغة بس كمان ده مش هينجح ومش هيستمر بسبب الطابع الكارمي لبرج العقرب. لأن في النهاية الخير بيكسب والتركيز علي طاقة الثور المحكومة بالزهرة فالفرص والنجاح للي هيختار السلم ومش الحرب؛ للي هيزرع ومش بس هدفه يستهلك؛ للتعاون ومش الأنانية وعارفة انها تبدو كلمات بسيطة بس أثرها كبير لأن قوة الثور تكمن في (بساطته) ولذلك خدها قاعدة: 
اللي هيختار الحرب هيخسرها 
اللي هيختار اخفاء الحقيقة هيختفي هو
اللي هيطمع هيخسر 
في الحقيقة قوة 
في البساطة قوة
في الصمت قوة
وكل ده مرتبط بطاقة الثور.

. اخر نقطة حابة اضيفها قبل ما أنهي كلامي تتعلق بالاستقلال لأن خلال المرحلة دي هنجد دول بتستقل؛ هنجد تطورات وتغيرات ضخمة في بعض الدول والتحالفات والشراكات الكبيرة وبعيدًا عن الدول والسياسة في اعتقادي المرحلة دي هيبقي فيها موجة استقلال وهنجد افراد كتير مننا وحوالينا حابين يستمتعوا بحياتهم ويعيشوا ببساطة وعشان كده الناس هتبدأ تعتمد علي نفسها وهنجد اشخاص كتير منجذبة لفكرة انها تزرع أكلها؛ تصنع منتجات طبيعية بنفسها؛ تبعد عن حياة المدينة والنمط المعقد للحياة وتبدأ بزنس خاص بيها وتبقي مسؤولة عن حياتها وعشان كده أنا حاسة ان دي هتبقي مرحلة رائعة لينا بإذن الله خاصًة مع وجود المشتري ونبتون في برج الحوت إيماننا بالله هيزيد؛ رغبتنا في التقرب لله هتزيد؛ لأننا بنتكلم عن مزيج الثور والعقرب والحوت وعشان كده ناس كتير هتبدأ تفكر في روحها ودرجة إيمانها؛ أشخاص كتير مننا هتمر بيقظة روحية بجانب ان مبادئنا ونظرتنا لمفهوم الثراء والنجاح المادي هتختلف لأن العقدة الجنوبية في برج العقرب هتدمر المفاهيم القديمة اللي عقدتنا؛ القيم والمبادئ والأشخاص اللي مش بتخدمنا وصلاحيتها انتهت ولذلك متحمسة جدًا للمرحلة دي لأني متأكدة ان كل شخص فينا هيكتشف جوانب ثرية وغنية في شخصيته وحياته؛ في مواهب ومهارات هيتم استغلالها واكتشافها؛ في أحلام بتتحق؛ في إيمان بيزيد ودي أحلي حاجة. 


. أنا بحب أتكلم عن عقد القمر جدًا وحبيت أعرض نبذة عن الطاقة المقبلة وأضيف فيها وجهة نظري وأثرها في إطار عمومي أكتر ويمكن دي حاجة مش بعملها كتير وأتمني حقيقي تكون استمتعت عزيزي القارئ زي ما أنا استمتعت وبالتأكيد كل فرد فينا هيتأثر بعبور مماثل بشكل مختلف لأنها هتتوقف علي طبيعة خريتطك والبيوت والأتصالات الموجودة كما ذكرت من قبل ولذلك أعمل بحثك الخاص وشوف العبور ده هيقع في أي بيوت في خريطتك أو الجأ للتحليل لو أنت متحمس أو لو حاسس انها مرحلة مهمة في حياتك ومحتاج تعرف عنها بدقة. وكالعادة وفي النهاية تأكد إن مفيش بطل لحكايتك غيرك :) وحابة ننهي موضوع النهارده بالاية المفضلة عندي من سورة النور:

( الله نور السموات والأرض مثل نوره كمشكاة فيها مصباح المصباح في زجاجة الزجاجة كأنها كوكب دري يوقد من شجرة مباركة زيتونة لا شرقية ولا غربية يكاد زيتها يضئ ولو لم تمسسه نار؛ نورعلي نور يهدي الله لنوره من يشاء)

ولو حابب تتابع مواضيع أكتر؛ تقولي هاي او تحلل خريطتك ممكن تتواصل معايا علي تويتر وللأبد بحبكم أبطالي 💜

https://twitter.com/Chiron_Cono