دخول زحل الجدي

. قبل أي حاجة خليني أتمني للجميع سنة سعيدة ومنتجة تكونوا فيها أقوي وأجمل وأرفع أكيد، 2017 كانت سنة طويلة وأحداثها بطيئة شوفنا فيها الحلو وصادفنا الوحش بس بالنسبالي الأحلي كان أكتر من الأوحش و تحديداً لأني عرفتكم من خلال السنة الرائعة دي و حرفياً كلكم ومن غير استثناء بقيتوا جزء كبير من حياتي الفوضوية علي الاخر، واسمحولي كمان في البداية اشكر حد بشكل شخصي في نهاية السنة و هي حبيبتي سلمى لأنها كانت أختي من أول يوم اتكلمنا فيه ومن غير تشجيعها ماكنتش كملت في الصفحة دي أصلاً *بحبك يا سلومي* الي القمر وبلا عودة..

. تاني حاجة لازم اعملها إني اعتذر بشكل شخصي لأي حد في مرة زعل مني أو حس إني تجاهلت اسئلته أو رغباته أو بأي شكل ضايقته بكلامي و بمنتهي الصدق مفيش أي تعمد مني إني اتجاهل أي حد أو اسئلته ورغباته ولكن الوقت فعلاً مش مساعدني والعدد مش قليل وأنا بحب أكون دقيقة في شغلي و كلامي ف أنتوا قلبكم أبيض وهتسامحوني أنا عارفة..

. كده ممكن نبدأ نتكلم عن زحل الجدي و بصراحة أنا يمكن أكون اتكلمت بدري شوية عن دخول زحل الجدي في ثريد علي تويتر و ده لأني كنت متحمسة جداً علي خروجه من القوس بما إني جوزاء و بما إنه عمل معايا الواجب :D  الثريد دي مهمة وحابة إنكم ترجعوا ليها ولذلك هحط اللينك بتاعها في نهاية الموضوع عشان تقدر تشوف الدنيا ماشية إزاي بشكل أشمل وأكبر و بكده هنتكلم في نقط مختلفة غير اللي اتكلمت عنها في الثريد عن دخول زحل الجدي عايزاكم بس من خلالها تفكروا بمرونة أكتر لأن في ناس منهارة عندي في المينشنز والخاص..

. أول حاجة لازم تتفائلوا و تهدوا أعصابكم لأن النهارده لما أي كوكب أو نقطة تدخل برج جديد بيبقي زي بشرة خير إن في إمكانيات وفرص جديدة هتيجي في طريقنا وكمان مسؤليات زيادة ومختلفة مع شوية سلبيات وده طبيعي والكلام ده ينطبق علي أي كوكب سواء كان زحل أو المشتري، الشمس، القمر، ليليث أو العقدة الشمالية ودخلوا كل حاجة بتشتغلوا بيها في خريطتكم بس خلوني أقول إن دايماً دخول المشتري، زحل، اورانوس، نبتون أو بلوتو برج جديد بيعتبر حدث فلكي مهم لأن الكواكب دي بتاخد فترة أطول في البرج عكس الشمس اللي بتقعد شهر في كل برج أو القمر اللي بيقعد يومين ونص وهكذا..

. مش هنتكلم عن كل الكواكب والنقط دي وهنتكلم عن كوكب واحد و هو زحل، زحل عامل زي جوز عمتك الغلس أو قعدة جدتك المملة أحياناً أو شنب مدير مدرستك القديم أو الأسبوع اللي قبل الامتحانات أو مناقشة بينك و بين جوزك علي مين هيودي العيال التمرين أو الدرس وغيره ف زحل دايماً دلالة علي مسئولية، سلطة، حاجة مملة مش عايز تعملها، نظام، قواعد، عجز بس كمان نضج، احترام، استمرارية و ثبات..

. زحل هيدخل الجدي يوم 19 ديسمبر 2017 وهيغادرنا علي ديسمبر 2020 يعني بنتكلم في 3 سنين ليهم طعم وروح وأهداف مختلفة، ده غير إن زحل داخل بيته يعني مش داخل بيت غريب وده لأن زحل بيحب يبقي في الجدي، زحل حاكم الجدي ف الطاقة واحدة ولذلك النتائج أحلي إن شاء الله. حضرتك محتاج تشوف إيه في خريطتك؟ مبدئياً أنت هتركز علي أي نقط أو كواكب في برج الجدي/السرطان/الميزان/الحمل ليه دول تحديداً يا وندر؟ أقولك، ده لأن زحل الجدي هيقترن مع أي كوكب عندك في الجدي خلال الفترة دي وهيعاكس أي كوكب عندك في برج السرطان وهيعمل تربيع مع أي كوكب عندك في الحمل أو الميزان وطبعاً درجات الاتصال هتختلف طول المدة بمعني إن لو قمرك جدي 6 يبقي هتحس جداً بتأثير زحل الجدي لما يوصل لدرجة 6 وكل ما توسع الدرجة كل ما التأثير يقل وهكذا..

. عشان كده بنقول السرطان والحمل والميزان بجانب الجدي طبعاً من أكتر الأبراج اللي هيتأثروا بزحل الجدي و ده مش معناه إن لو ماعندكش كوكب أو نقطة في أي برج منهم إنك مش هتتأثر لأن ببساطة زحل ده هيمر علي بيت معين عندك وهيركز كل طاقته علي نشاط البيت ده ف لا مفر يا شباب كلنا لابسين :D بس بصراحة المسألة مش بهذا السوء اللي المعظم متوقعه ومش بس بتكلم من خلال قراءة أو تداول مني للموضوع لأ أنا بتكلم عن تجربة شخصية مريت بيها واتكلمت فيها معاكم وخليني ارجع اعيد فيها نقط بسيطة عشان بس اريحكم ولأن التجربة تكسب المعرفة من وجهة نظري..

. بداياً للي مايعرفش أنا شمسي وعطارد في برج الجوزاء و هيمنتي قوس وبلوتو عامل اتصالات كتيرة في خريطتي فزحل القوس كان عامل معايا الواجب علي الاخر لأنه معاكس لشمسى وعطارد ولأني هيمنة قوس يعني مش روتينية ولا بحب النظام والمسؤلية فزحل طبعاً كان مصعب الدنيا شوية لأنه حابب إني اتعلم حاجة بفتقدها في شخصيتي بجانب اتصالات بلوتو اللي بتخليني شخص عنيد ومتطرف في تصرفاته والكارثة الأكبر إني ماعنديش اتصالات زحل يعني زحل مش من الكواكب المهيمنة في خريطتي ف كانت هيصة وطاقة جديدة عليا خالص ومن غير مبالغة وده دخلني المرحلة "الكليشيه" بتاعة زحل أنا بحب اسميها كده اللي هي الانعزال والاكتئاب والفشل والبرود في التعامل وكل السواد بقي خدوا مني كتير بس تاني الوضع كان معايا مختلف لأن وضع خريطتي مختلف وعشان كده دايماً بقولكم خريطتك ليها الكلمة الأخيرة. بمعني؟

. اقولك، يعني لو شخص مثلاً عنده زحل مقترن بطالعه أو بشمسه أو بلاش عامل تربيع لقمره هيبقي علاقته بطاقة زحل مختلفة تماماً عن شخص ماعندوش خالص زي حالاتي يعني هيبقي علي الأقل متعود بنسبة 60% ف عشان كده مش عايزة حد يخاف خالص فعلاً أو يقول أنا داخل علي اسوأ أيام حياتي لأنه مش شرط لأن في نهاية رحلتي مع زحل القوس أنا حققت أحلام ولا كنت أتخيل إنها ممكن تحصل وكانت مجرد أحلام قبل ما يدخل زحل القوس في حالتي اللي عرضتها كمثال..

. لما زحل الجدي يبقي في اتصال مع شمسك، قمرك، طالعك، زهرتك، الميدهيفن أياً يكن في خريطتك توقع إن طاقة الكوكب أو البيت المتأثر بزحل هتبقي ماشية بسرعة ابطأ عكس العادة أوالمسؤليات في المنطقة دي مش لذيذة كالعادة وهتبدأ ترهق أو تمل أو تلاقي ناس بتقولك يا فاشل أو مش بتلاقي تشجيع كفاية وهكذا و ده بيحصل لأن زحل عايز يضغط عليك عشان يطلع أحسن ما فيك أو كل اللي عندك وبعدين الضغط فعلاً بيطلع منك أحسن شغل وساعات بيخلق جواك عزيمة، مفيش أكل بيستوي من غير نار ومفيش نجاح بسهولة  وبالمناسبة أهم القرارات معظم الوقت بتتاخد في الأوقات اللي زحل بيبقي بيمر أو بيتصل بأي شكل بكواكب أو بيوت معينة في خريطتك..

. خد بالك النهارده لما حضرتك تعرف ان المدام حامل أو تعرفي إنك هتخلفي طفل ده أسعد وأجمل خبر ممكن تسمعه في حياتك بس في نفس الوقت مسؤلية جبارة وحدث هيغير روتينك وحياتك أكيد ولذلك أوقات كتير بنلاقي ستات بتخلف أو بتفكر بجدية في الحمل لما زحل يمر علي بيتها الخامس ومعتمدة علي اتصالات تانية أكيد بس هنلاقي مثلاً ان زحل هنا هيديك مسؤلية بتتمثل في ولادة طفل في الوقت ده وطبعاً شئ عظيم بس خد بالك البيت الخامس بيت المتعة، الرومانسية، الخروجات والثقة ف هتلاقي نفسك الفترة دي تلقائياً اتحرمت من الحاجات دي أو انعزلت عنها وستات كتيربعد الولادة بتزعل علي وزنها وشكل جسمها وهكذا بس طبعاً ده مش معناه إن كل شخص زحل هيمر علي بيته الخامس هيخلف عشان عارفاكم بس :D ده مجرد مثال منتشر شوية

. اللي عايزة اقوله واللي دايماً بلاحظه إن الناس مش بتحاول تستمتع ودايماً مقدرين الوحش قبل الحلو والمضحك إن حالة الحزن والهلع دي مش هتغير أي شئ اللي ربنا كاتبه في النهاية من نصيبك ف بلاش تصعبوا الأمور علي نفسكم زيادة وخليكم أشخاص مرنة وبعدين شوف زحل الجدي ده هيلمس إيه في خريطتك واسأل نفسك ونبه نفسك كمان وقول اه زحل ده هيعاكس قمري مثلاً الفترة دي يبقي أنا محتاج أعبر عن مشاعري ومحتاج مابعدش وانعزل واحاول اصبر علي قد ما اقدر وهكذا ف خلي عندكم وعي بطاقتكم هي دي الفكرة اللي أنا عايزة أوصلها و فككوا من الكلام التجارى وأنا أسفة في الكلمة بتاع دي سنة سودا عليك وعلي مش عارف مين :D ده مش حقيقي..

. أخيراً أتمني إن الموضوع يكون عاجبكم أو علي الأقل وضح نقط بسيطة .. أنا بعتبر إن دول كلمتين من القلب مني ليكم لأن بالفعل عملت ثريد للموضوع قبل كده بس حسيت إني محتاجة أقول الكلمتين دول. في النهاية خريطتك ليها الكلمة الأخيرة وأنا في غاية الحماس وعايزاكم كمان متحمسين بدخول زحل الجدي، بدخول زحل مكانه وبيته. احتفلوا بالانتصارات وازعلوا علي الاخفاقات في النهاية الحياة مرة بتصيب ومرة بتخيب سواء زحل دخل الجدي أو دخل أي برج تاني :)



ده ثريد عن دخول زحل الجدي اللي اتكلمت عنه في تويتر:
https://twitter.com/Chiron_Cono/status/859351242597969920




. 

. و أخيراً لو عاجبك الموضوع و فهمت حاجة أعمل شير و لايك و وصله للصين :)
. و لو مهتم تفهم خريطتك و شوية تفاصيل عنها ممكن تحجز عندى لتحليل الخريطة و تكلمنى على تويتر هتلاقينى هناك و هتلاقي مواضيع مهمة كمان هتعجبك 

https://twitter.com/Chiron_Cono



↵ التفاؤل نوع من الايمان اللي في النهاية بيخليك تحقق حاجة حتي لو بسيطة وماحدش هيعرفها لأن مفيش أي حاجة في الدنيا ممكن توصلها من غير أمل، ثقة وحب. الكره بيخلق كره والعداوة بتخلق عداوة فقط المحبة تخلق المستحيل .. كل سنة وأنتم وأنا بخير 

الميدهيفن

. زي ما اتكلمنا قبل كده عن الطالع وقولنا إنه باب البيت كان لازم كمان نتكلم النهارده عن الميدهيفن أو Midheaven أو MC عشان نبقي بندي كل حاجه حقها، وبصراحة الميدهيفن من موضوعاتي المفضلة لأن سهل جداً تعرف أو تحدد الmc  بتاع أي شخص بسهولة عكس الطالع بل احياناً ممكن تخمن الميدهيفن صح وتخلطه بالطالع..


. لو الطالع طاقته بتعكسها غصباً عنك أو بتلقائية شديدة ومن غير بذل أي مجهود ف لازم تعرف إن الميدهيفن طاقة بتعكسها بمزاجك ومش بتلقائية ولا حاجة بل بالعكس إنت بتبذل مجهود وبتحاول عشان تمثل برج الميدهيفن بتاعك..


. من الحاجات اللي لازم تعرفها إن الميدهيفن أو البيت العاشر مش بس الشئ الوحيد اللي بيحدد العمل والكارير أو الوظيفة في الخريطة الفلكية بالعكس ده كليشيه منتشر قوي، أكيد طبعاً مفتاح مهم لتحديد المهنة أو الوظيفة لكن مش كامل وماينفعش نعتمد عليه لوحده. زي ما قولت في الأساس الMC يعتبر الصورة أو الهيئة اللي عايز الناس تشوفك عليها واللي طول الوقت هتحاول تسعي إنك تكون عليها..


. في أشخاص بتسعي إنها تمثل وأشخاص تانية عايزة تخترع وأشخاص غيرهم عايزة تعلم وفي ناس نفسها تتعلم وناس نفسها تحب وناس عايزة تنام وتفسي دماغها من مشاكل العالم وأمثلة كتير، في النهاية كل شخص بيسعي لشئ ما عايز الناس أو العالم تشوفه بطريقة معينة وعشان كده خلينا نتكلم عن الميدهيفن بشكل سريع في أبراج مختلفة، مثلاً لو كان في:


الحمل: الأشخاص دي عايزة الناس تشوفها قوية، نفسهم يبقوا في مراكز قيادية سواء في شغل أو غيره عايزين يحققوا وينجوزا حاجات مهمة قبل أشخاص كتير حواليهم.

الثور: الأشخاص دي عايزة تظهر مستقرة وعايزين دايماً يحصلوا علي مكاسب مادية مش زي الحمل هيحب يقود أو يبقي منافس ويوصل الأول لأ، عايزين يعملوا حاجة بيحبوها و ف نفس الوقت مربحة وفيها استمرارية.

الجوزاء: حد عايز يتشاف اجتماعي وحد دايماً بيسعي يبقي عنده علاقات ومعارف كتير، دايماً بيحاول يشتغل علي ذكائه وعلي حس الفكاهة اللي عنده.

السرطان: الأشخاص دي عايزاك تشوف الجانب العاطفي اللي فيهم، عايزينك تحس بمشاعرهم ولذلك دايماً بيحاولوا يحسسوا الناس بالدفا أو بالراحة وبيحاولوا بطريقة مباشرة أو غير مباشرة إنهم يقدموا حاجة محدش غيرهم هيعرف يقدمها أو يعملها.

الأسد: لو في حد عايز يسيطر علي العالم ف أكيد هما ميدهيفن الأسد. الأشخاص دي عايزة تلمع عايزة كله يشاورعليها سواء كان نجم من نجوم السينما أو مجرد شخص عادي جداً وبيعمل حاجات مملة، بغض النظر عن اللي بيعمله في حياته هيبقي محتاج تقدير عليه.

العذراء: الأشخاص دي عايزاك تعتمد عليهم محتاجة تسمع منك كلمة "أنا بثق فيك" هتلاقيهم دايماً بيسعوا للمثالية وبيحاولوا يعملوا أي حاجة بشكل صح جداً حتي الغلط بيعملوه صح.

الميزان: من غير ما يعملوا أي الحاجة دول محبوبين وعشان كده ميدهيفن الميزان شوية محظوظين لأنهم بيسعوا للعدل والجمال وكل القيم الجميلة اللي بنسمعها ومش بنشوفها :D

العقرب: الأشخاص دي عايزة تتشاف مثيرة وجذابة ومش بس علي المستوي الجسدي لأ كمان الفكرى. ومع ذلك الأشخاص دي بتحاول تبان متحفظة ومش عايزاك تعرف عنها كتير.

القوس: الأشخاص دي عايزاك تؤمن بيهم وبأفكاراهم، بيحاولوا يعرضوا نفسهم بطرق مختلفة ويقنعوا الناس بفلسفتهم ولذلك بيسعوا للعالمية وبتلاقي ناس كتير منهم معروفة بشكل كبير حتي لو مش مشهورين.

الجدي: الناس دي عايزة احترام أي حاجة بيعملوها أو هيعملوها مش عايزين من وراها غير شئ واحد احترام واهتمام بس الجدي مش الأسد في النهاية مش هيقولك "احترمني/حبني/اتصور معايا عشان أنا فشيخ" بس جرب قلل من الجدي وخاصاً الميدهيفن وهيتعمل معاك الصح :D

الدلو: الأشخاص دي هتسعي للجديد هتسعي للمستقبل، عايزين الناس تشوفهم بطريقة مختلفة وعايزين يظهروا دايماً جداد ومختلفين ولذلك متعاونين جداً ودايماً بيجربوا ويغامروا.

الحوت: الأشخاص دي هتبقي عايزة تتشاف عميقة أو تتشاف زي لوحة فنية جميلة بس في نفس الوقت عايزين الناس تشوف الحكمة والتسامح اللي جواهم، ميدهيفن الحوت عايزين يبقوا كذا حاجة أكتر من ميدهيفن الجوزاء يمكن و ساعات بيفصلوا و بيحسوا بالتشتت من كتر ما هما بيحاولوا يبقوا كذا حاجة في نفس الوقت.


. في الصورة دي عملت دايرة حمرا علي MC اللي هو بيمثل الميدهيفن في الخريطة للناس اللي مش عارفة، ف حضرتك هتفتح خريطتك وهتشوف الدايرة المكتوب فيها MC وهتلاقي برج الميدهيفن بتاعك بدرجته زي ما موجود في الصورة عندنا هنلاقي إن الميدهيفن في الجوزاء بدرجة 19





. طبعاً مش محتاجة أقول قد إيه الميدهيفن مهم وبصراحة أي حاجة في خريطتك مهمة بس كالعادة الكلمة الأخيرة للخريطة كلها ولذلك البرج لوحده مش كفاية ومش مقياس ف ماحدش ياخد حاجة "كالعادة" علي قلبه و دمتم جميعاً سعداء.

. و أخيراً لو عاجبك الموضوع و فهمت حاجة أعمل شير و لايك و وصله للصين :)
. و لو مهتم تفهم خريطتك و شوية تفاصيل عنها ممكن تحجز عندى لتحليل الخريطة و تكلمنى على تويتر هتلاقينى هناك و هتلاقي مواضيع مهمة كمان هتعجبك 

https://twitter.com/Chiron_Cono



↤ الثقة مش هتيجي بس لو خسرت كرشك أو صغرت مناخيرك ونفخت شفافيك ولبست ساعة بمليون دولار كل دي حاجات هتساعدك وهتعمل فرق ومش غلط أكيد بس مش الطرق الوحيدة لكسب الثقة كمان، ابعدوا شوية عن المرايا وجربوا تشوفوا نفسكم في عيون ناس بتحبكم واسألوا هما بيحبكوا ليه؟ أكيد عندهم اجابة هتعجبكم 

البيت السابع

. البيت السابع هو أهم بيت في العالم أهم من بيتك ذات نفسه :D أعرف ناس كتير جداً حبت تتعمق في علم الفلك أو تعرف عنه بسبب البيت السابع بس، طبعاً أول حاجة المعظم بيجري عليها أول ما يفتح خريطته هي البيت السابع وخاصاً الستات كله عايز يعرف صفات أو شكل أو مهنة الشخص اللي هيرتبط بيه بس السؤال بقي يا حضرات هل البيت السابع بالأهمية دي؟!


. أكيد طبعاً البيت السابع مهم وأي كوكب أو نقطة بتبقي فيه تأثيرها ووضعها بيكون مميز بس الحقيقة البيت السابع مش بس مميز لأنه بيت الزواج أو بيوضح طبيعة الحياة الزوجية وصفات شريك/شريكة حياتك واحياناً مهنتهم وشكلهم، لأ هو مميز ومهم لأن البيت ده دايماً بيحمل صفات أنت شخصياً بتفتقدها ودايماً بتدور عليها في الناس اللي حواليك لأن ماتنساش إن بيتك السابع في النهاية عكس بيتك الأول
الأول: أنت
السابع: هما



. في المطلق أنت بتعكس صفات بيتك الأول واحياناً من غير ما تقصد يعني لو مثلاً بيتك الأول ميزان هتلاقي نفسك بشكل تلقائي بتحاول تخلق نوع من التوازن والسلام في أي حاجة بتعملها حتي لو أنت نفسيتك جحيم من جوا وقلبك أسود بس دي حاجة هتطلع منك بشكل تلقائي أو غصباً عنك لدرجة إنك ممكن تتشاف متصنع من كتر ما بتحاول تبان مثالي وجميل قوي، و في الحالة دي بيتك السابع هيكون حمل ودي الصفات اللي أنت بتفتقدها أو عندك بس مش بتعكسها وبتلاقي نفسك بتجذب أشخاص ومواقف بتعكس طاقة الحمل دي في حياتك ومش شرط يكون ليها علاقة بجوازك بس. ولذلك مش دايماً هتلاقي الأشخاص اللي بيتهم الأول أو طالعهم ميزان شخصيات عنيفة بالعكس بس دايماً بيجذبوا اشخاص ومواقف بتطلع منهم الجانب العنيف أو العدواني اللي فيهم وبيدخلوا علاقات حامية أو شغوفة بسبب وجود برج الحمل في بيتهم السابع لأن يا عزيزي كلنا بندور علي اللي ناقصنا علي اللي مش فينا والكلام ده بيتك السابع هو اللي بيمثله، وهكذا طبق النظرية دي بقي علي بقية الأبراج.


. البيت السابع هو بيت المساومة ده غير إنه في الأصل بيت الميزان يعني *أنا وأنت* *أنت وأنا* ولذلك هو بيت الزواج لأن الزواج ده عقد بين إتنين ومش شخص واحد وكمان بيت المعاملات التجارية والاتفاقيات لأن النهارده لما حضرتك بتعمل مشروع معين أو بتتفق علي حاجة معينة بتعملهم مع شخص تاني أو أكثر من شخص كمان، وأكيد بيت العقود لأن أي عقد هتعمله في حياتك سواء زواج طلاق شراء بيع اياً كان هيمثله بيتك السابع وكل المعاملات دي بتعملها بمساعدة ناس تانية سواء تعرفها أو لأ.



. فالبيت السابع بيمثل أي شخص ممكن تقابله في حياتك بحكم مصلحة معينة أو لتحقيق غرض أو رغبة انت عايزاها، ولذلك الشخص اللي عنده الجدي في بيته السابع مثلاً هنلاقي انه بيواجه صعوبة في تعاملاته في بداية حياته أو دايماً بيتعامل مع ناس جدية جداً وقليلة الكلام ولسبب ما أكبر منه سناً أو هو كشخص بيفضل يتعامل مع ناس مجتهدة ومرموقة ومهمة ومش عايز يعرف أو يتعاقد مع حد أي كلام سواء في شغل جواز أو غيرهم وده لأنه هو شخصياً بيفتقد العملية في حياته أو الجدية بسبب طاقة السرطان اللي بيعكسها من بيته الأول ومش شرط يكون مش عملي ومش جد عشان طالعه سرطان أنا قلت ان البيت الأول بيعكس بعض الصفات غصباً عنك ومش شرط تكون فعلاً عندك، ف لو مثلاً طالعك سرطان وقمرك في الحمل أو شمسك في البيت العاشر يا نهارعزيمة يعني بس لسه برضه غصباً عنك هتلاقي نفسك بتعكس طاقة السرطان الحنونة والكيوت:D ولذلك دايماً بقول إن خريطتك ليها الكلمة الأخيرة ومش قصدي اغلس عليكم والله لما بقول كده بس لازم تفتكروا دايماً إني بتكلم بشكل عام وبدي أمثلة مختلفة صعب تنطبق عليك لأن حالتك مختلفة كلياً بحكم اختلاف خريطتك.


. لذلك لما تيجي تشوف بيتك السابع لازم تشوف البرج اللي بيقع فيه وبعدين تشوف لو عندك كوكب أو أكتر هناك أو حتي نقطة معينة ولو مفيش ولا كوكب في بيتك السابع شوف حاكم البيت ده إيه، يعني لو بيتك السابع جوزاء هيبقي الحاكم عطارد ساعتها وهكذا.


. وعاماً هنزل لينك للثريد بتاعة الكواكب في البيت السابع اللي عملتها علي تويتر قريب في حالة لو حضرتك ماشفتهاش وتقدر من خلالها تعرف صفات الشخص اللي هتجذبه أو هترتبط بيه ولو حابين إني اعمل ثريد تانية اتكلم فيها عن الكواكب في بيتك السابع والصفات اللي بتتمناها بشكل عام في تعاملاتك بعيداً عن صفات شريك حياتك أو الأشخاص اللي هتجذبها طبعاً قوليلي في الكومنتس ومن عينيا، ده غيران في ثريد جاية عن البيت السابع الفترة الجاية مش هتكلم عنها دلوقتي بس ليها علاقة برضه بصفات الشخص اللي هتجذبه.


. أخيراً البيت السابع بيمثل صفات بتفقتقدها ومش بتقدر تعكسها أو يمكن مش بتهتم بيها ودايماً بتواجه الصفات والجانب ده من خلال تعاملاتك ومن خلال الناس اللي بتيجي في حياتك وترتبط بيك سواء في عقد زواج عمل أو شراكة والخ وطبعاً يا حبايب القلب كله معتمد علي خريطتك وبيتك السابع، فلو بيتك السابع مثلاً متأثر ببرجين الوضع هيختلف والاتصالات كمان هتعمل فرق وهكذا ف محدش ياخد حاجة علي قلبه ونبي ودمتم جميعاً سعداء :)




. لينك ثريد الكواكب في البيت السابع https://twitter.com/Chiron_Cono/status/916611684541849600

. و أخيراً لو عاجبك الموضوع و فهمت حاجة أعمل شير و لايك و وصله للصين :)
. و لو مهتم تفهم خريطتك و شوية تفاصيل عنها ممكن تحجز عندى لتحليل الخريطة و تكلمنى على تويتر هتلاقينى هناك و هتلاقي مواضيع مهمة كمان هتعجبك 

https://twitter.com/Chiron_Cono



❤ وافتكروا دايماً إن مش كل الناس هتحبك ولا كل الناس هتكرهك، موهبتك استغلها وخليهم يضيعوا وقت يحاولوا يكونوا فيه أنت و أنت مالكش مثيل :) 

ليليث في الخريطة التوافقية

. بما إنه من المواضيع اللي الناس بتسأل عليها كتير ودايمًا عندها شغف إنها تتعمق وتعرف عنها شوية فأكيد كان لازم أكتب عنها مع إني مش حابة قوي فكرة التوسع أو الكلام عن الخريطة التوافقية في الوقت الحالي لكن أكيد هتكلم عن الموضوع ده بما إن أشخاص كتير سألت عليه لأن اسئلتكم كلها بتبقي في دماغي وببقي مهتمة اجاوب علي الأسئلة التكرارية دايمًا بس من غير لأقول لحد :D



. ذكرت قبل كده ليليث في تحليل الخريطة التوافقية اللي عملته لرانبير وديبيكا لو حد فاكر وقلت إننا لازم نتعامل بحذر شديد مع ليليث في الخريطة التوافقية ولسه عند رأيي لأن ليليث مش بالطعامة وال cuteness اللي الناس متخيلاها بالعكس ليليث طاقته زي بلوتو في الخريطة التوافقية بيخلق طاقة الهوس بين الشخصين ومش شرط يكون في حب حقيقي أو رابط رومانسي مثلًا.


. هرجع وأقول إن في فرق بين اتصال كيوت ورومانسي أو بيخلق تناغم وبين اتصال بيخلق انجذاب وهوس غالبًا مالوش مبرر يعني لما تلاقي مثلًا شخصين بينهم علاقة تثليث،تسديس أو اقتران بين القمر والزهرة هتلاقي معظم الوقت ان بينهم رومانسية أحضان كتير شوكولاتة متبادلة دباديب حمرا شكلها مرعب وحاجات كيوت كده والي حد ما تقليدية عكس مثلًا شخصين بينهم الزهرة وليليث هتلاقي إن في انجذاب غامض وهوس ملوش مبرر أو دايمًا بيفكروا في بعض بسبب ومن غير وممكن مايكونوش قابلوا بعض غير مرة وكانت صدفة.


. الغريب واللي دايمًا بيلفت نظري إن أشخاص كتير بتنجذب لعلاقات ليليث وقصدي "بعلاقات ليليث" يعني العلاقات اللي ليليث بيكون فيها واضح ومؤثرفي الخريطة التوافقية بين شخصين زي الشمس وليليث، الزهرة، المريخ أو القمر وليليث وغيرهم وبسأل نفسي سؤال واحد، يا تري ليه بننجذب للعلاقات المعقدة أو اللي دايمًا فيها نوع من التحدي وعدم الاستقرار؟! زي مثلًا ما تكون في حفلة، تجمع أي مكان وتتعرف علي شخصين لأول مرة واحد شمسك مقترنة بزهرته والتاني شمسك مقترنة ب ليليث بتاعه بشكل تلقائي هتلاقي نفسك معجب بشكل ولباقة أو ريحة مثلًا الشخص اللي زهرته لمست شمسك بس مستغرب جدًا ومنجذب بشكل غير عادي وعمال تفكر بينك وبين نفسك في الشخص اللي ليليث بتاعه لمست شمسك وممكن تكون العلاقة بينكم ماكنتش في دفا وجمال الشخص اللي زهرته لمست شمسك، ف ده مثال حي إننا فعلًا بنفضل العلاقات المعقدة أو اللي مش سهلة.


. ليليث زي بلوتو شوية في الخريطة التوافقية بمعني إن العلاقة دايمًا فيها نوع من التطرف ولحظات قوية بين الحب والكره يعني أوقات كتير هتحس إنك مش طايق الشخص ولا عايز تشوف وشه بس في نفس الوقت مش عايز ولا قادر تبعد عنه ولا عارف تبطل تفكير فيه ولو شفته بيكلم حد غيرك هتخلص عليه وعلي اللي بيكلمه ف طاقة الهوس ومبدأ أنت بتاعي، ملكي دي بتبقي واضحة جدًا في علاقات ليليث حتي لو العلاقة مش واخدة شكل معين بجانب إن اتصالات ليليث بتخلق انجذاب جنسي كبير جدًا بين الشخصين ودايمًا في نوع من المراوغة في التعامل أو تلميحات بينهم بس من تحت لتحت أو ماحدش بياخد باله وبيفهمهما غيرهم ف ال teasing و ال chasing من الحاجات اللي بتميز برضه علاقات ليليث.


. مين بيبقي مهووس أو منجذب لمين أكتر الشخص صاحب ليليث ولا الشخص صاحب الكوكب؟!

. ده سؤال مشهور ومنتشر جدًا وبصراحة هو سؤال عايم أو مش صح لأن مين هيبقي مهووس أكتر بمين معتمدة علي حاجتين أولهم خريطة كل شخص بشكل منفرد يعني خريطة الميلاد بتاعة كل شخص وثانيهم الخريطة التوافقية اللي بينهم لأن في النهاية ليليث هيبقي عامل اتصال أو اتنين بجانب مليون اتصال تانين عندهم في الخريطة. يعني لو مثلًا حضرتك بطابعك غيور أو عندك كذا كوكب في برج الثور أو العقرب أو حتي ليليث عندك قوي يعني مقترن بطالعك أو بالميدهيفن أو بزهرتك وغيره من اتصالات بتقوي تأثيره ف أنت أصلًا كشخص بتميل للغيرة وعندك حب التملك ف لما تبقي في علاقة مع شخص في بينكم اتصالات ليليث مش هتفرق اذا كنت الكوكب أو ليليث بقي لأنك من غير حاجه غيور ومتعود علي الطاقة دي لكن لو أنت شخص هوائي أو عندك كذا كوكب في الميزان، الدلو أو الجوزاء ومش غيور بطابعك أومش عاطفي قوي ودخلت علاقة فيها اتصالات ليليث بينك وبين شخص تاني هنا أكيد أنت هتبقي مهووس أكتر بالشخص ده ولسبب انت مش عارفه في حين انك في المطلق مش كده وفي حين إنك ممكن تبقي في علاقة تانية بعدين مافيهاش اتصالات ليليث وماتحسش بالطاقة دي خالص. ولذلك صعب إني احدد مين هينجذب أكتر لمين من غير ما اشوف الخريطة كلها وإن كنت بلاحظ في بعض الحالات إن لما يكون الراجل ليليث بتبقي الست مهووسة أكتر ولكن في النهاية بتعتمد علي الخريطة وباقي الأتصالات، وفي النهاية هرجع وأقول ان اتصالات ليليث بشكل عام بتخلق هوس بين الطرفين.


. طبعًا أقوي اتصال هو الاقتران ده دايمًا بيبقي تأثيره واضح جدًا يجي بعد الأقتران المعاكسة في التأثير، بصراحة مش بفضل التربيع مع إنه بيخلق جذابية كبيرة بس بيجهد العلاقة والأشخاص علي الفاضي وطبعًا مش في كل الحالات بس بحس إن مرهق وبالنسبة للتثليث والتسديس مش بهتم بيهم لأنهم مش مؤثرين للدرجة من وجهة نظري الشخصية عشان ماحدش ياخد الكلام علي أعصابه :D


. وبالتالي أي اتصال من اللي أنا قلت عليهم بيجمع بين ليليث و:
الشمس
القمر
الزهرة
المريخ
أو الطالع
وفي درجات قليلة أكيد بيلعبوا دور مؤثر وواضح في الخريطة وبناءًا علي ذلك مش بهتم ب ليليث والمشتري أو بلوتو واورانوس في الخريطة التوافقية وإن كنت بهتم ب ليليث وزحل في بعض الحالات.


. في النهاية اتصالات ليليث مش سيئة بالعكس كلنا محتاجين نحس إننا بنحب بجنون وإن في حد بيموت علينا وبيفكر فينا 24 ساعة، في لحظات بنبقي محتاجين فيها نتطرف ونكسر كل الملل وروتين بس كمان الحب عمره ما كان تحدي ولا تملك ولا هو هوس، القلب عمره ما بيحب حد بسبب معين، في ناس كتير قلبك بيقف من السعادة لما بتشوفهم بتبقي عايز تديهم كل حاجة عندك ومستعد تسامحهم مرة واتنين وتلاتة. الحب هو الراحة والأمان الحب هو الأستقرار لو أنت بتحب حد ومش لاقي معاه راحة، أمان أو استقرار وكل اللي موجود بينكم مجرد لحظات حلوة بتملي فراغ أو كلام مسكرأو غيرة زايدة من غير سبب يبقي محتاج تعيد حساباتك لأن لو علي الكلمة المسكرة أو اللحظة الحلوة ف دي حاجات سطحية ممكن تتخلق في أي وقت لكن احساسك بالراحة والأمان وأن مهما حصل هترجع تلاقي حضن مستنيك ف هي أشياء لا تشتري يا بهوات. الغيرة والهوس عمرهم ما كانوا دلالة علي الحب اللي بيحبك هيحبك تكبر وتبقي أحسن جاجة في الدنيا وعمره ما هيقعد يقيدك ويحبطك بحجة إنه خايف عليك .. اللي بيحب مابيخفش :)


. أتمني أكون قدرت أوصل فكرتي وماكنتش رومانسية بزيادة النهارده أو يكون قمر الحوت اثرعليا :D وطبعًا وكالعادة ماحدش ياخد حاجة علي قلبه دي مجرد فكرة عامة لأن .. خريطتك ليها الكلمة الأخيرة ..

. و أخيراً لو عاجبك الموضوع و فهمت حاجة أعمل شير و لايك و وصله للصين :)
. و لو مهتم تفهم خريطتك و شوية تفاصيل عنها ممكن تحجز عندى لتحليل الخريطة و تكلمنى على تويتر هتلاقينى هناك و هتلاقي مواضيع مهمة كمان هتعجبك 

https://twitter.com/Chiron_Cono


♫ وافتكروا دايمًا إن  ليس كل ما يلمع ذهبًا، ماتنخدعوش بالمظاهر والكلام اللامع شوفوا قلوب الناس قبل ما تشوفوا شكلهم لأن القلب يكسب القالب. 

اتصالات القمر و المريخ

اتصالات القمر و المريخ من الاتصالات المنتشرة و اللي ليها تأثير و نكهة مميزة جداً بتكون واضحة في صفات و طباع الشخص..

أول حاجة لازم تعرفها ان القمر هو جزء حساس جداً و شخصي في خريطة الشخص و المدارس الهندية بتعتمد بشكل كبير علي القمر و مكانه و اتصالاته و أنا شخصياً بفضل القمر و بحس إن الشخص أقرب لقمره عن شمسه وماحدش يفهم الجملة دى غلط بس القمر هو أنت لما تكون لوحدك بليل القمر بيمثل الطريقة اللي بتتعامل بيها مع الناس، إزاي بتتعامل مع الكوارث، ردود فعلك اللي بيحسسك بالأمان و ممكن نقعد نتكلم لحد الفجر عن القمر و اللي بيمثله..

لكن المريخ قصة تانية خالص، المريخ عايز يثبت نفسه و مستعد يقلع القميص و يتعارك في أي وقت بس يدافع عن نفسه و ياخد حقه، المريخ عنيف و قوي و متحمس و قصدي طبعاً إن دي الحاجات اللي بيمثلها بس أنا بحب اتكلم بطريقتي أنتوا عارفين :D
المهم إيه اللي ممكن يطلع لما نمزج طاقات كوكبين زي دول ببعض؟ حاجات كتير حقيقي بس هنتكلم عن جزء منها


. أولاً الأقتران أو التطابق:

. اقتران القمر بالمريخ بيخلق شخص شغوف جداً و رغباته كتيرة عايز ينجح بأي طريقة و في أسرع وقت، شخص باقتران زي ده هيبقي طبعه حامي و سريع يعني مش هيصبر عليك كتير لما يحتاج حاجة هيكون محتاجها دلوقتي و مش هيستني.

. الناس اللي عندها الأقتران ده هتكون واضحة و جريئة، الأبيض أبيض و الأسود أسود مش بيعرفوا يجملوا مشاعرهم أو يخبوها لو بيحبك هيقولك و لو بيكرهك هيقولك كمان الأشخاص دي بيبقي فيهم شوية عنف و اندفاع و أوقات كتير بيعتمد علي مزاجه و مووده قبل ما يحقق أي حاجة.


. ثانياً التربيع:

. الأشخاص اللي عندهم تربيع بين قمرهم و المريخ دول دايماً الناس بتخاف منهم و من غير أسباب واضحة و ده راجع للهالة القوية اللي بيعكسوها و اللي بتخوف الناس منهم مع انهم بيطلعوا أطيب خلق ربنا، هما حرفياً الناس اللي بتقعد تتعارك وتقولك والله لأحلق حواجبك و اقطع فخادك لكلاب الشوارع و تقعد تعلي صوتها و بعدها بخمس دقايق تيجى تقولك معلش انا اسف و ينزلوا علي مفيش.

. حاجة كمان أن الأشخاص الي عندهم التربيع بين القمر و المريخ بيتعصبوا بسرعة جداً وأقل كلمة ممكن تخليهم نار قايدة مش بتطفي و لذلك لو تعرف حد بالاتصال ده خد بالك انت بتقوله ايه لأنه ممكن يرتكب فيها جريمة من غير ما يحس من كتر الاندفاع والتهور وأنت لو شخص عندك الأتصال ده أتعلم تعقل الكلام وتفكر قبل ما تعمل أي حاجة.


. ثالثاً المعاكسة:

. المعاكسة بين القمر و المريخ دايماً بتخلق نوع من الأختلاف والمشاكل مع الأم و التربيع كمان بيخلي العلاقة متوترة بس مش زي المعاكسة، كمان المعاكسة بتخلي الشخص مندفع جداً و عصبي في علاقاته العاطفية و يا اما هو مش بيستحمل عيوب اللي بيحبه و دايماً متعصب يا اما العكس بيجذب أشخاص طبعها حامي جداً و دايماً متعصبة عليه و مش متقبلة عيوبه.

. معاكسة القمر و المريخ كمان بتخلي الشخص غير متحكم و مسيطر علي مشاعره اهو ده اللي فضيحة يعني لو اتعصب شوية ولا اتحرق دمه و قرر يتعارك معاك هيفضحك قدام الناس كلها و يطلع كل اسرارك، هما للأسف مش شاطرين في حفظ الأسرار و ده راجع لعدم قدرتهم علي التحكم في مشاعرهم و ردود فعلهم.


رابعاً التثليث و التسديس:

. التثليث و التسديس بين القمر والمريخ اتصال لذيذ و بيعمل محامي شاطريعنى لو حد بيدرس قانون أو ناوي يبقي قاضي، محامي فده اتصال مناسب لأن الشخص بيبقي شجاع ومش بيخاف يقول الحق ويدافع عن الصح بس من غير عنف أو تهور. حاجة كمان في التثليث و التسديس مش موجودة في باقي الأتصالات هو تحكم الشخص في مشاعره وقدرته علي التوقف في الوقت المناسب، لو راجل عنده الاتصال ده هيبقي محبوب جداً و مشهور وسط الستات ولو ست عندها الأتصال ده هتبقي مغرية جداُ و جذابة للجنس الاخر. و بشكل عام اتصالات القمر والمريخ بتدي جذابية شديدة للأشخاص وأغلبيتهم بتكون أجسامهم حلوة.


خامساً عدم تطابق أو عدم اقتران القمر و المريخ:
اللي هو ال Inconjunct

. لو كان القمر بيستقبل تأثيرات سلبية كتير بجانب عدم التطابق مع المريخ الشخص ده هيبقي عنيف بنسبة كبيرة و بيتعاطي بعض انواع المخدرات بس أغلبية اللي بيحصل في حالات عدم التطابق هو إن الشخص مش بيبقي قادر يفرق بين رغباته و مشاعره و بتبقي مشاعره مهيمنة جداً و مسيطره عليه لدرجة إنها بتشله و بتخليه مش عارف يتصرف و بيعمل أى حاجة.


وكالعادة الخريطة ليها الكلمة الأخيرة وأنا بحاول بس اديك فكرة عن اتصالات القمر و المريخ ومش شرط طبعاً ينطبق علي حضرتك لأن دلالة أو أتصال واحد لا يكفي ومش مقياس..

. و أخيراً لو عاجبك الموضوع و فهمت حاجة أعمل شير و لايك و وصله للصين :)
. و لو مهتم تفهم خريطتك و شوية تفاصيل عنها ممكن تحجز عندى لتحليل الخريطة و تكلمنى على تويتر هتلاقينى هناك و هتلاقي مواضيع مهمة كمان هتعجبك 

https://twitter.com/Chiron_Cono


♫ وافتكروا دايماً إن في حاجات مش هتعرفوا توصفوا جمالها مهما حاولتم، استمتعوا بالجمال بدل ما تحاولوا تصوره :) 

كايرون

كايرون أكيد كويكبي المفضل و من المواضيع اللي أنا بحبها جداً و قريبة لقلبي فى علم الفلك و قصته مؤثرة جداً و جميلة حقيقي، مش هتكلم عن اتصالاته ولا حالته في البيوت ولا الأبراج و ههتهم بالجزء ده فى تويتر ولكن هتكلم هنا عن قصة كايرون..

كايرون هو المعالج و مش المعالج العادى لأ، كايرون هو اللي بيطبطب علي الناس و يقف معاهم و مش لاقى حد يطبطب عليه و يقف جانبه ومش لاقى حد يقف جانبه مش عشان هو شرير مثلاً أو العالم كله أوغاد لأ ببساطة عشان هو مجروح و مسموم و ماحدش يقدر يساعده حتى نفسه و ماكنش قدامه حل غير مساعدة و معالجة غيره بمنتهي الحب والصدق..

لو عايز دكتور شاطر أو معالج موهوب و محلل فلك و منجم مفيش زيه يبقى عينك ماتجيش غير علي كايرون مفيش منافس للأشخاص دي و ماحدش يقولي برج العقرب و نبتون و كلام جوز خالتى الأقرع ده :D أكيد طبعاً الكلام ده بيساهم زى الهيمنة المائية اتصالات نبتون والخ و لكن الأشخاص اللي بتشتغل في مجالات طبية أو خدمات معالجة و علم الفلك وشاطرين مش بس في المجالات تقضية واجب بيبقي عندهم كايرون فى بيت مهم و مؤثر في خريطتهم أو متصل بكواكب معينة و ظاهر في خريطته و قوي بشكل عام..

كايرون من السنتور "القنطور" و ده مخلوق أسطوري طبعاً في الأساطير الاغريقية، بياخد جسم الحصان و لكن صدر رأس و وش الإنسان طبعاً اللي حابب يعرف أكتر عن المخلوق ده و غاوي الأساطير ممكن يتعمق و يستمتع بجد و لكن أنا اللي يهمني هنا كايرون اللي هو من السنتور أو المخلوقات دي و عشان كده كايرون كان جسده جسد حصان و لكن نصفه العلوي إنسان..

كايرون هو ابن كرونوس و كايرون كان عكس الجميع لأنه كان كريم جداً و حكمته و معرفته عالية ده غير إنه كان بيساعد و يعلم بشكل مميز و درب أهم و أعظم أبطال الأغريق زي هرقل و أخيل، أم كايرون كانت حرية بحر فى الأصل و كان زيوس بيطاردها لحد ما حولت نصف جسدها لحصان وبعدين كانت حامل و لما ولدت كايرون و شافت شكله اتصدمت و طلبت إنها تتحول لشجرة و فعلاً اتحولت لشجرة و بكده كايرون اتساب من والده و والدته..

بس كايرون كان دايماً عايز يبقى حاجة و بتشوف الشغف ده اللي طالع من الم و مأساة جواه و لذلك اهتم انه يتعلم و يعلم لحد ما بقي معلم ماهر جداً و معالج في نفس الوقت، نفس طبيعة كايرون في خريطتك دايماً المكان اللي هيبقى كايرون فيه ده أكتر مكان هتبقي عايز تعلم و تساعد الناس في و من غير مقابل أو حتي كلمة شكر، مساعدة طالعة من الم جواك..

ليه كايرون مجروح أو المعالج اللي ملوش دوا؟ فى مرة كايرون كان بيعلم حد من تلاميذه و بيديله سهم مسموم و بشكل ما السهم المسموم وقع من إيده و دخل في رجله و طبعاً كايرون مامتش لأن والده كان اله اغريقى و لذلك كايرون كان خالد. فكان لازم يعيش مسموم في الم شديد طول الوقت مايقدرش يعالجه و يخف منه بس الغريب و الشئ اللي يضحك و يبكي في نفس الوقت إنه كان بيعرف يعالج و يخفف كل الناس لأنه كمان كان معروف بشطارته في المجال الطبى..

مع كل ده ماكنش في حاجة بتشفي المه هو، كان كل يوم عايش ميت و كان بيطلب من الالهة انهم يسيبوه يموت لأنه تعب و مش قادر يكمل و زي أى أسطورة الالهة سمعت لطلبه و قررت ترحمه من المه وعذابه الشديد نتيجة إخلاصه و شغله اللي ساعد بيه اشخاص كتير جداً..

أنا بحب كايرون جداً و متأثرة بقصته بشكل كبير و الأشخاص اللي كايرون مؤثر و قوي في خريطتهم دايماً قريبين لقلبي و دايماً مميزين، في فيلم هندي اسمه Guzaarish الفيلم ده بيتكلم عن شخص مصاب بشلل رباعي و مش قادر يعيش و بيطلب الموت الرحيم لأنه ببساطة مش قادر يتحمل الالم بس في نفس الوقت هتلاقي إن البطل جواه حكمة و حب للحياة مش طبيعى و بيعلم اللي يعرفه بدون مقابل ولذلك قصة قريبة جداً لقصة كايرون و من أفلامى المفضلة المهتم يبقي يتفرج عليه و هيفهم القصة..

أكيد هتكلم عن كايرون بشكل أكبر الفترة القادمة ان شاء الله بس حسيت إني محتاجة اتكلم عن قصته و تأثيرها الشخصي عليا مش أكتر :)

. و أخيراً لو عاجبك الموضوع و فهمت حاجة أعمل شير و لايك و وصله للصين :)

. و لو مهتم تفهم خريطتك و شوية تفاصيل عنها ممكن تحجز عندى لتحليل الخريطة و تكلمنى على تويتر هتلاقينى هناك و هتلاقي مواضيع مهمة كمان هتعجبك

https://twitter.com/Chiron_Cono




♫ و افتكروا دايماً إنه مش مهم أنت مين أو عملت إيه أو الناس شايفاك إزاي في النهاية أنت هتعمل الصح لأنك ببساطة حد كويس :) 

عشر اتصالات

كنت قاعدة مع احد الأصدقاء و سألنى عن أحسن و اسوأ الأتصالات في الخريطة و بعدين قولتله ان مفيش حاجة اسمها كده في المطلق لأن كله فى النهاية عايز نوع من التركيز، الادراك و التوازن.

بس فكرت أكتب عن أكتر 10 اتصالات و أماكن أنا شخصياً بحب اشوفهم فى الخريطة و مش عشان هما حلوين أو احسن من اتصالات و حاجات تانية.


1. تثليث أو تسديس اورانوس للشمس، القمر، عطارد، الزهرة أو المريخ

. من أكتر الأتصالات اللي بحب اشوفها لأنها بتدى الشخص نوع من الاختلاف بس بشكل معتدل وصعب الشخص يتشاف زى الباقي عادى و دايماً عنده هالة محببة و غريبة أو بالأصح ملفتة بس مش مبتذلة.


2. اقتران الشمس و القمر

. ببقي سعيدة جداً لما اشوف اقتران زى ده لأن الشخص بيبقى مرتاح في نفسه بشكل مش طبيعي و مش بيتكسفوا يكونوا تلقائيين أو يعبروا عن نفسهم و مشاعرهم، هو اه مش اتصال سهل للدرجة دي بس حلو و مميز.


3. اقتران أو معاكسة القمر و المريخ

. على قد إنه اتصال مرهق جداً و متعب عاطفياً لكن لما بشوفه بعرف ان قدامي شخص شغوف و عينيه بتلمع كده من الحماس و الاندفاع، ده غير إن أكتر المزز عندهم اتصال بين القمر و المريخ ف مين يكره يعني.


4. اقتران عطارد و المريخ

. الصراحة راحة و دي أجمل حاجة في الأتصال ده، الناس دي اللي في قلبها علي لسانها و أنت مش محتاج غير الصراحة.


5. مريخ العقرب

. مهما كانت خريطتك وحشة و شايف ان مناخيرك أحلي منها لوعندك المريخ في العقرب ف غالباً أنت مش ناقصك حاجة غير تنزل و تشوف نفسك في إيه و كله هيجي لحد عندك.


6. اقتران المشتري بالطالع، ال MC أو المريخ

. اتصالات المشتري معظمها حلوة مع العلم إن فيه بعض التعلقيات يعني بس المشتري برج كله honey و اقترانه بأي حاجة من دول تحديداً بيخلي الشخص مبهج و سعيد من غير سبب احياناً.


7. لما يكون القمر أو الزهرة في الثور أو الميزان

. الطعامة و الشقاوة بحب اشوف القمر أو الزهرة في البرجين دول تحديداً حتي لو وضعهم سئ لأني بحس ان الشخص يمتلك من اللباقة و الذكاء اللي يخليه يعدي بحاجات كتير و قادر يحتفظ بشكله و روحه الحلوة.


8. اقتران الزهرة و نبتون

. دايماً أقول يا بخت اللي بيحب حد عنده اتصال بين الزهرة و نبتون لأنهم حقيقي أحسن ناس تحبك و تجيب ناس تحبك كمان بس الأهم إن دايماً الأشخاص دي بتبقي جذابة جداً و ملفتة و هما مش حاسين بده و شايفين أنهم عادي مع العلم إنه العكس تماماً.


9. زحل في البيت الأول

. عارفة إنه مكان صعب و الشخص يا عيني يومه ب سنة بس بحب أشوفه جداً و بحس إن الشخص عنده اصل و صبر شديد و الحقيقة إن معظم الأشخاص اللي اشتغلت معاهم و عندهم المكان ده عندهم نوع من التسامح مع غلطاتهم و عيوبهم وفعلاً بيكبروا بحلاوة .. ageing gracefully af


10. المريخ و بلوتو

. اتصالات المريخ و بلوتو تقيلة و محتاجة شغل كتير جداً بس قوة لا يستهان بيها و جذابية جبارة، بيعرفوا يحركوا أي حد من غير ما يقولوا كلمة حاجة كده زي أنت معلم و احنا منك نتعلم.

. و أخيراً لو عاجبك الموضوع و فهمت حاجة أعمل شير و لايك و وصله للصين :)

. و لو مهتم تفهم خريطتك و شوية تفاصيل عنها ممكن تحجز عندى لتحليل الخريطة و تكلمنى على تويتر هتلاقينى هناك و هتلاقي مواضيع مهمة كمان هتعجبك 

https://twitter.com/Chiron_Cono


♫ و افتكروا دايماً ان وجودكم مهم و مؤثر و الضعيف بس هو اللي يقلل من نفسه