دخول زحل الجدي

. قبل أي حاجة خليني أتمني للجميع سنة سعيدة ومنتجة تكونوا فيها أقوي وأجمل وأرفع أكيد، 2017 كانت سنة طويلة وأحداثها بطيئة شوفنا فيها الحلو وصادفنا الوحش بس بالنسبالي الأحلي كان أكتر من الأوحش و تحديداً لأني عرفتكم من خلال السنة الرائعة دي و حرفياً كلكم ومن غير استثناء بقيتوا جزء كبير من حياتي الفوضوية علي الاخر، واسمحولي كمان في البداية اشكر حد بشكل شخصي في نهاية السنة و هي حبيبتي سلمى لأنها كانت أختي من أول يوم اتكلمنا فيه ومن غير تشجيعها ماكنتش كملت في الصفحة دي أصلاً *بحبك يا سلومي* الي القمر وبلا عودة..

. تاني حاجة لازم اعملها إني اعتذر بشكل شخصي لأي حد في مرة زعل مني أو حس إني تجاهلت اسئلته أو رغباته أو بأي شكل ضايقته بكلامي و بمنتهي الصدق مفيش أي تعمد مني إني اتجاهل أي حد أو اسئلته ورغباته ولكن الوقت فعلاً مش مساعدني والعدد مش قليل وأنا بحب أكون دقيقة في شغلي و كلامي ف أنتوا قلبكم أبيض وهتسامحوني أنا عارفة..

. كده ممكن نبدأ نتكلم عن زحل الجدي و بصراحة أنا يمكن أكون اتكلمت بدري شوية عن دخول زحل الجدي في ثريد علي تويتر و ده لأني كنت متحمسة جداً علي خروجه من القوس بما إني جوزاء و بما إنه عمل معايا الواجب :D  الثريد دي مهمة وحابة إنكم ترجعوا ليها ولذلك هحط اللينك بتاعها في نهاية الموضوع عشان تقدر تشوف الدنيا ماشية إزاي بشكل أشمل وأكبر و بكده هنتكلم في نقط مختلفة غير اللي اتكلمت عنها في الثريد عن دخول زحل الجدي عايزاكم بس من خلالها تفكروا بمرونة أكتر لأن في ناس منهارة عندي في المينشنز والخاص..

. أول حاجة لازم تتفائلوا و تهدوا أعصابكم لأن النهارده لما أي كوكب أو نقطة تدخل برج جديد بيبقي زي بشرة خير إن في إمكانيات وفرص جديدة هتيجي في طريقنا وكمان مسؤليات زيادة ومختلفة مع شوية سلبيات وده طبيعي والكلام ده ينطبق علي أي كوكب سواء كان زحل أو المشتري، الشمس، القمر، ليليث أو العقدة الشمالية ودخلوا كل حاجة بتشتغلوا بيها في خريطتكم بس خلوني أقول إن دايماً دخول المشتري، زحل، اورانوس، نبتون أو بلوتو برج جديد بيعتبر حدث فلكي مهم لأن الكواكب دي بتاخد فترة أطول في البرج عكس الشمس اللي بتقعد شهر في كل برج أو القمر اللي بيقعد يومين ونص وهكذا..

. مش هنتكلم عن كل الكواكب والنقط دي وهنتكلم عن كوكب واحد و هو زحل، زحل عامل زي جوز عمتك الغلس أو قعدة جدتك المملة أحياناً أو شنب مدير مدرستك القديم أو الأسبوع اللي قبل الامتحانات أو مناقشة بينك و بين جوزك علي مين هيودي العيال التمرين أو الدرس وغيره ف زحل دايماً دلالة علي مسئولية، سلطة، حاجة مملة مش عايز تعملها، نظام، قواعد، عجز بس كمان نضج، احترام، استمرارية و ثبات..

. زحل هيدخل الجدي يوم 19 ديسمبر 2017 وهيغادرنا علي ديسمبر 2020 يعني بنتكلم في 3 سنين ليهم طعم وروح وأهداف مختلفة، ده غير إن زحل داخل بيته يعني مش داخل بيت غريب وده لأن زحل بيحب يبقي في الجدي، زحل حاكم الجدي ف الطاقة واحدة ولذلك النتائج أحلي إن شاء الله. حضرتك محتاج تشوف إيه في خريطتك؟ مبدئياً أنت هتركز علي أي نقط أو كواكب في برج الجدي/السرطان/الميزان/الحمل ليه دول تحديداً يا وندر؟ أقولك، ده لأن زحل الجدي هيقترن مع أي كوكب عندك في الجدي خلال الفترة دي وهيعاكس أي كوكب عندك في برج السرطان وهيعمل تربيع مع أي كوكب عندك في الحمل أو الميزان وطبعاً درجات الاتصال هتختلف طول المدة بمعني إن لو قمرك جدي 6 يبقي هتحس جداً بتأثير زحل الجدي لما يوصل لدرجة 6 وكل ما توسع الدرجة كل ما التأثير يقل وهكذا..

. عشان كده بنقول السرطان والحمل والميزان بجانب الجدي طبعاً من أكتر الأبراج اللي هيتأثروا بزحل الجدي و ده مش معناه إن لو ماعندكش كوكب أو نقطة في أي برج منهم إنك مش هتتأثر لأن ببساطة زحل ده هيمر علي بيت معين عندك وهيركز كل طاقته علي نشاط البيت ده ف لا مفر يا شباب كلنا لابسين :D بس بصراحة المسألة مش بهذا السوء اللي المعظم متوقعه ومش بس بتكلم من خلال قراءة أو تداول مني للموضوع لأ أنا بتكلم عن تجربة شخصية مريت بيها واتكلمت فيها معاكم وخليني ارجع اعيد فيها نقط بسيطة عشان بس اريحكم ولأن التجربة تكسب المعرفة من وجهة نظري..

. بداياً للي مايعرفش أنا شمسي وعطارد في برج الجوزاء و هيمنتي قوس وبلوتو عامل اتصالات كتيرة في خريطتي فزحل القوس كان عامل معايا الواجب علي الاخر لأنه معاكس لشمسى وعطارد ولأني هيمنة قوس يعني مش روتينية ولا بحب النظام والمسؤلية فزحل طبعاً كان مصعب الدنيا شوية لأنه حابب إني اتعلم حاجة بفتقدها في شخصيتي بجانب اتصالات بلوتو اللي بتخليني شخص عنيد ومتطرف في تصرفاته والكارثة الأكبر إني ماعنديش اتصالات زحل يعني زحل مش من الكواكب المهيمنة في خريطتي ف كانت هيصة وطاقة جديدة عليا خالص ومن غير مبالغة وده دخلني المرحلة "الكليشيه" بتاعة زحل أنا بحب اسميها كده اللي هي الانعزال والاكتئاب والفشل والبرود في التعامل وكل السواد بقي خدوا مني كتير بس تاني الوضع كان معايا مختلف لأن وضع خريطتي مختلف وعشان كده دايماً بقولكم خريطتك ليها الكلمة الأخيرة. بمعني؟

. اقولك، يعني لو شخص مثلاً عنده زحل مقترن بطالعه أو بشمسه أو بلاش عامل تربيع لقمره هيبقي علاقته بطاقة زحل مختلفة تماماً عن شخص ماعندوش خالص زي حالاتي يعني هيبقي علي الأقل متعود بنسبة 60% ف عشان كده مش عايزة حد يخاف خالص فعلاً أو يقول أنا داخل علي اسوأ أيام حياتي لأنه مش شرط لأن في نهاية رحلتي مع زحل القوس أنا حققت أحلام ولا كنت أتخيل إنها ممكن تحصل وكانت مجرد أحلام قبل ما يدخل زحل القوس في حالتي اللي عرضتها كمثال..

. لما زحل الجدي يبقي في اتصال مع شمسك، قمرك، طالعك، زهرتك، الميدهيفن أياً يكن في خريطتك توقع إن طاقة الكوكب أو البيت المتأثر بزحل هتبقي ماشية بسرعة ابطأ عكس العادة أوالمسؤليات في المنطقة دي مش لذيذة كالعادة وهتبدأ ترهق أو تمل أو تلاقي ناس بتقولك يا فاشل أو مش بتلاقي تشجيع كفاية وهكذا و ده بيحصل لأن زحل عايز يضغط عليك عشان يطلع أحسن ما فيك أو كل اللي عندك وبعدين الضغط فعلاً بيطلع منك أحسن شغل وساعات بيخلق جواك عزيمة، مفيش أكل بيستوي من غير نار ومفيش نجاح بسهولة  وبالمناسبة أهم القرارات معظم الوقت بتتاخد في الأوقات اللي زحل بيبقي بيمر أو بيتصل بأي شكل بكواكب أو بيوت معينة في خريطتك..

. خد بالك النهارده لما حضرتك تعرف ان المدام حامل أو تعرفي إنك هتخلفي طفل ده أسعد وأجمل خبر ممكن تسمعه في حياتك بس في نفس الوقت مسؤلية جبارة وحدث هيغير روتينك وحياتك أكيد ولذلك أوقات كتير بنلاقي ستات بتخلف أو بتفكر بجدية في الحمل لما زحل يمر علي بيتها الخامس ومعتمدة علي اتصالات تانية أكيد بس هنلاقي مثلاً ان زحل هنا هيديك مسؤلية بتتمثل في ولادة طفل في الوقت ده وطبعاً شئ عظيم بس خد بالك البيت الخامس بيت المتعة، الرومانسية، الخروجات والثقة ف هتلاقي نفسك الفترة دي تلقائياً اتحرمت من الحاجات دي أو انعزلت عنها وستات كتيربعد الولادة بتزعل علي وزنها وشكل جسمها وهكذا بس طبعاً ده مش معناه إن كل شخص زحل هيمر علي بيته الخامس هيخلف عشان عارفاكم بس :D ده مجرد مثال منتشر شوية

. اللي عايزة اقوله واللي دايماً بلاحظه إن الناس مش بتحاول تستمتع ودايماً مقدرين الوحش قبل الحلو والمضحك إن حالة الحزن والهلع دي مش هتغير أي شئ اللي ربنا كاتبه في النهاية من نصيبك ف بلاش تصعبوا الأمور علي نفسكم زيادة وخليكم أشخاص مرنة وبعدين شوف زحل الجدي ده هيلمس إيه في خريطتك واسأل نفسك ونبه نفسك كمان وقول اه زحل ده هيعاكس قمري مثلاً الفترة دي يبقي أنا محتاج أعبر عن مشاعري ومحتاج مابعدش وانعزل واحاول اصبر علي قد ما اقدر وهكذا ف خلي عندكم وعي بطاقتكم هي دي الفكرة اللي أنا عايزة أوصلها و فككوا من الكلام التجارى وأنا أسفة في الكلمة بتاع دي سنة سودا عليك وعلي مش عارف مين :D ده مش حقيقي..

. أخيراً أتمني إن الموضوع يكون عاجبكم أو علي الأقل وضح نقط بسيطة .. أنا بعتبر إن دول كلمتين من القلب مني ليكم لأن بالفعل عملت ثريد للموضوع قبل كده بس حسيت إني محتاجة أقول الكلمتين دول. في النهاية خريطتك ليها الكلمة الأخيرة وأنا في غاية الحماس وعايزاكم كمان متحمسين بدخول زحل الجدي، بدخول زحل مكانه وبيته. احتفلوا بالانتصارات وازعلوا علي الاخفاقات في النهاية الحياة مرة بتصيب ومرة بتخيب سواء زحل دخل الجدي أو دخل أي برج تاني :)



ده ثريد عن دخول زحل الجدي اللي اتكلمت عنه في تويتر:
https://twitter.com/Chiron_Cono/status/859351242597969920




. 

. و أخيراً لو عاجبك الموضوع و فهمت حاجة أعمل شير و لايك و وصله للصين :)
. و لو مهتم تفهم خريطتك و شوية تفاصيل عنها ممكن تحجز عندى لتحليل الخريطة و تكلمنى على تويتر هتلاقينى هناك و هتلاقي مواضيع مهمة كمان هتعجبك 

https://twitter.com/Chiron_Cono



↵ التفاؤل نوع من الايمان اللي في النهاية بيخليك تحقق حاجة حتي لو بسيطة وماحدش هيعرفها لأن مفيش أي حاجة في الدنيا ممكن توصلها من غير أمل، ثقة وحب. الكره بيخلق كره والعداوة بتخلق عداوة فقط المحبة تخلق المستحيل .. كل سنة وأنتم وأنا بخير