. اورانوس والبيت السابع، بجانب كل الكواكب والنقط والنجوم الثابتة والكويكبات اللي ممكن تكون في البيت السابع إلا إن أكتر سؤال دايماً بيجيلي هو عن تأثير اورانوس في البيت السابع؟ الناس بتسيب كل حاجة وتمسك في اورانوس :D وبصراحة حقهم أنا مش بلوم حد لأن انت ممكن يكون عندك اورانوس في أي بيت بس مش هتحس بجنانه إلا لو في بيتك السابع..
. المضحك بالنسبة ليا هما الأشخاص اللي عندهم اورانوس في السابع ذات نفسهم لأن أغلبهم بيبقي في حالة تمرد شديدة علي وضعه العاطفي ونوعية الناس اللي بيجذبها في حياته ويقعد يقول ليه يا رب مفيش علاقة بتكمل، مفيش حد مناسب يبدو طبيعي في حياتي واسئلة حزينة كتير من النوعية دي هما في الأصل السبب فيها لو ركزنا وده بسبب خوفهم الشديد من الأرتباط بشكل فعلي وجدي، اهو دول بقي اللي بيخافوا من ال commitment وتلاقيهم طول الوقت شايلين هم الجواز والارتباط ومشاكل الانسانية وكيف بدأ الخلق وهل الديناصورات صديقة الإنسان ولا لأ! وأول ما تظهر في حياة حد فيهم أشخاص طبيعية وتقليدية وعلاقات إنسانية بسيطة نشوف حالة الهلع بقي اللي بيصابوا بيها..
. هو الأكيد إن ظهور اورانوس هنا مش هيخلي حياتهم الزوجية وحتي الاجتماعية والطريقة اللي بيشوفوا من خلالها الناس ويتعاملوا بيها تقليدية أو مملة أو تتميز بالاستمرارية، دايماً توقع الغير المتوقع ومش لدول بس خد بالك أي بيت هيقع في اورانوس عندك هتتميز شئون البيت ده بعنصر مفاجئ هتلاقي البيت ده بيقولك "بخ" كل شوية ودي مش حاجة وحشة لأن مين بيكره المفاجأت والأشياء الغير مخطط ليها والمتوقعة. بس لو هنفكر بعملية الناس النهارده بترتبط عشان تستقر، عشان تكبر حلم مع شخص ما بتحبه أو مش بتحبه بس ناس في أسرتها بتحبه :D مش هنختلف لأن في النهاية الهدف من أي علاقة في الكون هي الاستقرار، الاستمرار والشعور بالنظام الداخلي خلينا نقول ودي كلها حاجات عكس اورانوس أو هيبقي صعب يوفرها ليك في البيت السابع..
. طيب، هل معني كلامي ان اللعنة حلت علي الأشخاص اللي عندها اورانوس في البيت السابع؟ لأ خالص. لأن في الأساس هما مش بيسعوا للعلاقات اللي الأغلبية بتسعي ليها هما الأقلية المميزة خليني أقول وفي دماغهم نقط وتفاصيل محددة جداً محدش يعرفها ويسعي اليها غيرهم ف ماتخفش عليهم هما عندهم قدرة كبيرة علي التكيف مع وضعهم اللي يبدو فوضوي جداً لحضرتك وعشان اسهل عليك الموضوع راقب شخصين انت تعرفهم بشكل قريب سواء من اسرتك او قرايبك او اصحابك او اصدقاء الشغل واحد فيهم عنده زحل في السابع والتاني اورانوس في السابع وهتحس بفرق كبير في كل ما يسعي إليه كل واحد ونوعية الشخصيات اللي كل واحد بيجذبها وقد إيه مختلفين وماقولتش كواكب تانية لأن دول بيبقوا ملحوظين بالنسبة ليا عن الباقي..
. خد بالك ان الأشخاص اللي عندها اورانوس في البيت السابع مستقلة جداً ومش عايز ولا حابب انه يعتمد علي حد ولو ماقدرش يلاقي اللي هو عايزه في دماغه ومتخيله مش هيخاف يعيش من غير جواز أو يرفض مليون علاقة مهما كبر في السن وشعره ابيض ومش هيتأثر لما تقوله اللي في سنك بقي عندهم عيال واحفاد والكلام اللي كله عارفه هما مش بيفرق معاهم كل ده ومش هيفرق ف محدش يدخل عليهم بالكلام الأهبل ده، حاجة كمان اورانوس بيعملها في البيت السابع مع الناس دي إنه ممكن تلاقي علاقات ظهرت بشكل مفاجئ وغير متوقع في حياتهم وخلتهم يتسرعوا أو يتجوزوا اسرع جوازة في الوجود بمعني إن ممكن يكون الشخص في سن أو وقت أو مرحلة غير مناسبة للارتباط أو يكون هو شخصياً مش بيفكر في الموضوع بعدين يظهر حد فجأة تحس إنه نزل من السما ويقولهم "هاي ممكن نتجوز؟ فيقوموا قايلين اه" وتلاقي كل حاجة حصلت في ساعتين بالظبط :D وعشان كده اورانوس في البيت السابع من دلالات تعدد الزواج أو وجود أكثر من زواجة لو بقية الخريطة بتدعم ده..
. بالمناسبة هو مش شرط أو لازم عشان اورانوس في بيتك السابع يبقي صعب تستقر في علاقة واحدة لفترة طويلة وهكذا لأن في النهاية في خريطة وبيوت تانية واتصالات وليلة سودا :D يعني لو انت مثلاً عندك اورانوس في السابع بس زحل مقترن مع زهرتك أو عندك زهرة بتسيب بالعافية وبتحب تستني للاخر زي الثور، العقرب أو الجدي والسرطان حتي ففي الحالة دي القصة هتختلف وده هيودينا لنقطة تانية هي إن احياناً ببساطة الأشخاص اللي عندها اورانوس في السابع بتجذب اشخاص مستقلة جداً أو متمردة جداً أو دماغ عبقرية وسابقة عصرها أو بيشتغلوا في مهن غير تقليدية يعني في كذا سيناريو وقصة مختلفة وعشان كده محدش يتسرع في الحكم وخلاص و في نفس الوقت مش هينفع نتجاهل عنصر المفاجأة وعدم التوقع اللي هيبقي موجود بشكل عام..
. اخر حاجة حابة اضيفها للأشخاص اللي عندها اورانوس في البيت السابع هي إنها تعتمد علي ذكائها بشكل أكبر من كده ماينفعش يستنوا الموضوع يبقي فوضوي عشان يتحركوا ويفكروا بجنون و باستقلال وماينفعش دايماً يستنوا حد يخليهم يغامروا ويجربوا لازم يعتمدوا علي نفسهم في الجزئية دي مش مهم عبروا عن جنونكم وعن احتياجاتكم اللي تبدو غلط ومش طبيعية معظم الوقت لأن هتعملوا كده في وقت ما ف اسرعوا :)
. كالعادة خريطتك ليها الكلمة الأخيرة ولذلك محدش ياخد حاجة علي قلبه :)
. و أخيراً لو عاجبك الموضوع و فهمت حاجة أعمل شير و لايك و وصله للصين :)
. و لو مهتم تفهم خريطتك و شوية تفاصيل عنها ممكن تحجز عندى لتحليل الخريطة و تكلمنى على تويتر هتلاقينى هناك و هتلاقي مواضيع مهمة كمان هتعجبك
https://twitter.com/Chiron_Cono♪ و افتكروا دايماً انكم مش محتاجين تستنوا حد يغير حياتكم ويخليكم اسعد، اذكي أو حتي أغني خليكم أبطال نفسكم ودايماً دوروا علي السعادة والألوان و كل الحاجات المبهجة :)
